Bernardin Jakaj fiton në Vjenë ndaj boshnjakut Nomanoviç

Organizator i mbrëmjes sportive ishte ish-boksieri i njohur shqiptar në Austri, Shpëtim Shala. Përveç ORF Sport Plus dhe Art Sport, partner medial ishte edhe albinfo.at

Boksieri shqiptar që jeton në Austri, Bernardin Jakaj ka korrur fitoren e 16-të në boksin profesionist, shkruan albinfo.at. Në një sallë sporti në Maria Enzersdorf, të mbushur përplot me shqiptarë, Bernardin Jakaj ka arritur sonte fitoren e radhës, duke e mundur kundërshtarin e tij, boshnjakun, Enid Numanovic.

Meçi ishte me 10 runde dhe i takonte kategorisë gjysmë të rëndë, raporton albinfo.at. Të dy boksierët kishin hyrë mirë të përgatitur, ndërkohë Jakaj arriti t’ia sjellë humbjen e parë boshnjakut pas 23 fitoreve.

Pas fitores, Jakaj falënderoi të gjithë bashkëkombësit e tij për mbështetje të vazhdueshme në karrierën e tij profesioniste. Paraprakisht, janë zhvilluar edhe disa ndeshje tjera në këtë sport, në kategori të ndryshme, ku morën pjesë sportist të tjerë shqiptarë, ku u dalluan me fitore Leonard Balaj, Ndriqim Emini, Adrian Berisha, Bernard Haziri etj.

Ndërkohë boksieri Dielli Vranovci pas një lëndimi në sy, gjyqtarët vendosen që ta nderpresin ndeshjen në raundin e shtatë, dhe kësisoj titullin International Austria e fitoi boksieri turk, Anil Özdemir.

Organizator i kësaj mbrëmje sportive ishte ish-boksieri i njohur shqiptar në Austri, Shpëtim Shala. Vlen të theksohet se përveç ORF Sport Plus dhe Art Sport, partner medial ishte edhe albinfo.at.

---