Kosova e mbyll vitin e 101-ta në ranglistën e FIFA-s

FFK

Bëhet e ditur se përfaqësuesja e Kosovës në futboll do ta mbyllë vitin 2023 në pozitën e njëjtë që ishte edhe muajin e shkuar në ranglistën e FIFA-s, pasi shtëpia botërore e futbollit publikoi të enjten ranglistën përfundimtare, përcjell albinfo.ch.

Kosova zë pozitën e 101-të, me 1202 pikë të grumbulluara sikurse në muajin nëntor.

Po ashtu, në ranglistën e këtij muaji nuk ka lëvizur as Kombëtarja e Shqipërisë që vitin tjetër do të paraqitet në “Euro 2024”. Shqipëria mbetet e 62-ta me 1384 pikë të mbledhura për këtë vit.

Në fakt, prej listës së nëntorit, në total janë luajtur vetëm 11 ndeshje ndërkombëtare dhe për këtë arsye këtë muaj nuk ka ndryshime të mëdha në ranglistë.

Argjentina mbetet e para me 1855 pikë, duke e lënë pas vetes Francën (1845), Anglinë (1800), Belgjikën (1798) dhe Brazilin, që është i pesti me 1784 pikë.