Vaksina e re kundër dengës u testua me sukses në Zvicër

Rezultatet e një studimi klinik mbi një lloj të ri vaksine që nxit imunitetin qelizor për të luftuar ethet e dengut janë pozitive dhe inkurajuese.

Unisanté në Lozanë ka kryer një studim klinik mbi një lloj të ri vaksine që nxit imunitetin qelizor për të luftuar ethet e dengës. Rezultatet, të publikuara në The Lancet eBioMedicine, janë pozitive dhe inkurajuese, shkruan swissinfo.

Ngrohja globale dhe urbanizimi po lehtësojnë përhapjen e mushkonjave tigër, përgjegjëse për ethet denge. OBSH vlerëson se pothuajse gjysma e popullsisë së botës jeton në zona me rrezik të lartë dhe rastet e etheve të dengës janë tetëfishuar në 20 vjet. Prandaj, të kesh një vaksinë efektive është një përparësi, tha Unisanté në një deklaratë për shtyp të hënën, transmeton albinfo.ch.

Dy vaksina të dengës janë aktualisht të disponueshme në Evropë, por ato po rezultojnë të pakënaqshme për sa i përket sigurisë dhe efikasitetit. Teknologjia e tyre bazohet në prodhimin e antitrupave të cilët në raste të caktuara mund të rrisin ashpërsinë e sëmundjes.

Kjo është arsyeja pse Unisanté ka vlerësuar sigurinë dhe përgjigjen imune të një vaksine të mundshme të krijuar, duke përdorur një teknologji inovative për të nxitur imunitetin qelizor, pa stimuluar prodhimin e antitrupave.

Një qasje e re

Vaksina e testuar, PepGNP-Dengue, u zhvillua nga Emergex Vaccines, një kompani bioteknologjike me bazë në Mbretërinë e Bashkuar dhe përbëhet nga një nanodozë e fragmenteve sintetike të virusit të shkrirë me nanogrimca ari. Një veçori tjetër e veçantë është se administrohet nën lëkurë duke përdorur një mikrogjilpërë.

Vaksina mbështetet në limfocitet T, të cilat janë përgjegjëse për imunitetin qelizor, për të eliminuar qelizat e infektuara nga virusi dhe për të parandaluar riprodhimin e tij. Për të vlerësuar sigurinë e kësaj vaksine, e cila po administrohet te njerëzit për herë të parë, kompania zgjodhi Unisanté për shkak të përvojës së grumbulluar të institucionit në vlerësimin e vaksinave kandidate kundër Ebolës dhe malaries në veçanti.

Qëllimi i këtij studimi të fazës 1 ishte të përcaktonte nëse vaksina nuk shkaktonte efekte anësore të rënda të padëshiruara te vullnetarët e shëndetshëm. Gjithsej 26 pjesëmarrës nga mosha 18 deri në 45 vjeç u vaksinuan në Lozanë në vitin 2021 dhe u ndoqën për gjashtë muaj deri në mars 2022.

Edhe kundër Covid

Në studimin e kryer nga Blaise Genton dhe ekipi i Alix Miauton nuk u raportuan asnjë ngjarje serioze negative. Efektet anësore lokale (p.sh. dhimbje në vendin e injektimit) ishin më të shpeshtat e raportuara.

Rezultatet imunologjike tregojnë se PepGNP-Dengu mund të stimulojë një përgjigje specifike qelizore kundër virusit të dengut, pa prodhuar antitrupa. Kjo punë inkurajon hetimin e mëtejshëm të këtij kandidati për vaksinë dhe konsiderohet premtuese për sëmundje të tjera ku imuniteti qelizor është i rëndësishëm.

Një vaksinë e mundshme për Covid-19, e bazuar në të njëjtën teknologji, u testua gjithashtu nga Unisanté në 26 pjesëmarrës teksa rezultatet nuk janë publikuar ende.

 

---