Franca, Polonia dhe Gjermania paralajmërojnë për rritje të propagandës ruse 

Franca, Polonia dhe Gjermania e kanë akuzuar të hënën Rusinë se po e përgatit një rrjet të hollësishëm të uebsajteve për të përhapur propagandë proruse, në mënyrë që t’i minojë qeveritë e tyre.

Ato kanë paralajmëruar gjithashtu se do të ketë shpërndarje të madhe të përmbajtjes propaganduese para zgjedhjeve në Bashkim Evropian në qershor.

Vendet e Perëndimit i kanë akuzuar vazhdimisht operativët rusë se po i përdorin rrjetet sociale dhe internetin për të shpërndarë të dhëna të rrejshme apo mashtruese për t’i minuar ato, për ta promovuar Rusinë, apo për ndryshuar opinionin publik në vendet e tyre kundër mbështetjes së Ukrainës në luftën e saj nga pushtimit rus.

“Jemi në një kohë të ndjeshme kur do të kemi zgjedhje evropiane dhe, sa i përket Francës, organizimin e Lojërave Olimpike”, tha ministri i Jashtëm i Francës, Stephane Sejourne, gjatë një konference të përbashkët për media me homologët e vet, atë gjermane dhe atë polak në Paris.

Ministrat thanë se e kanë themeluar një mekanizëm të përbashkët për t’i vërejtur dhe për t’iu përgjigjur sulmeve të mundshme ruse në internet.

Reuters raportoi se sipas burimeve diplomatike, VIGINUM, vazhduesi francez i cili monitoron ndërhyrjet e huaja digjitale, i ka identifikuar rreth 193 uebsajte të cilat synojnë të shpërndajë gjerësisht të dhëna nga burime proruse, si dhe nga media dhe institucionet ruse.

“Synimi duket të jetë mbulimi i konfliktit Rusi-Ukrainë duke e paraqitur ‘operacionin special ushtarak’ në mënyrë pozitive dhe duke i nënçmuar Ukrainën dhe liderët e saj”, tha një diplomat francez, duke iu referuar termit të Moskës për pushtimin e paprovokuar të Ukrainës, transmeton rel përcjell albinfo.ch.

Kremlini e ka mohuar vazhdimisht se përhap të dhëna të rrejshme apo mashtruese. Këshilli i Sigurimit i Rusisë i kishte përshkruar si absurde akuzat se Moska kishte bërë propagandë me informata të rrejshme për të ndikuar tek votuesit gjatë zgjedhjeve të Parlamentit Evropian më 2019.

Franca në veçanti i ka kritikuar aktivistët rusë në Afrikë, duke thënë se aktorët e lidhur me Moskën kanë tentuar ta zhvlerësojnë Parisin në Afrikën Perëndimore, në mediat e rregullta dhe në rrjetet sociale.