Kosovë: Ka filluar shpërndarja e faturave të rrymës në katër komunat veriore

Nga sot në katër komunat veriore të Kosovës ka fillluar shpërndarja e faturave të energjisë elektrike, ka njoftuar kompania “Elektroseveri”.

Sipas njoftimit, qytetarët në Leposaviq, Mitrovicë të Veriut, Zveçan dhe Zubin-Potok kanë marrë fatura paushall prej 21.60 euro, teksa bashkë me faturën përdoruesit do të pajisen me një kopje të kontratës për inspektim, si dhe një njoftim për furnizuesin “Elektrosever”, transmeton albinfo.ch.

“Me pagesën e një shume prej 21.60 euro, Marrëveshja e Furnizimit me kompaninë ‘Elektrosever’ do të konsiderohet e lidhur. Zyrtarët e ‘Elektroseverit’ do t’ua sjellin qytetarëve për nënshkrim marrëveshjet për furnizimin me energji elektrike”, thuhet në njoftim.

Ndryshe, kontrata mes KEDS-it dhe “Elektroseverit” u nënshkrua në fillim të dhjetorit të vitit të kaluar, teksa Kosova dhe Serbia, marrëveshje për energjinë kanë arritur më 2013 dhe 2015, por të cilat nuk janë zbatuar.

Në qershor të vitit të kaluar që të dyja palët me ndërmjetësimin e BE-së janë dakorduar për zbatimin e udhërrëfyesit të energjisë. Sipas këtyre marrëveshjeve derivon edhe kontrata e nënshkruar mes KEDS-it dhe “Elektroseverit”.