Kurti: Adem Jashari lirinë e tij individuale e përbashkoi me lirinë e popullit të tij

Kryeministri Kurti në seancën solemne për shënimin e 26-vjetorit të Epopesë së UÇK-së ka thënë se më 5, 6 dhe 7 mars, populli i Kosovës bëri një kapërcim të madh në rrugën e gjatë për liri.

Ai tha se lufta çlirimtare e Adem Jasharit përmbledh një trashëgimi politike, kulturore dhe kombëtare, nga e cila ka ardhur liria e Kosovës.

“Ja ku sërish vjen marsi e ne mblidhemi për të kujtuar ditët e 5 të viti 1998 si data e tre ditëve kur populli i Kosovës bëri një kapërcim të madh në rrugën e gjatë për liri”, tha Kurti.

Ai shtoi  se në këtë datë Kuvendi mblidhet si për askënd tjetër për ta kujtuar rezistencën e Jasharajve.

“Në rastin e qëndresës së Jasharëve të Prekazit kjo provë është kaluar suksesshëm qysh para 25 vjetësh, kur në njëvjetorin e kësaj qëndrese më 6 mars 1999 trupa artistike “Hamëz Jashari e UÇK-së” e ideoi shënimin e parë të Epopesë së Ushtrisë Çlirimtare të Kosovës. Kështu udhëtimi që ka nisur qysh në mars në vitin 1999 në zjarrin e luftës në Prekaz dhe ku e mori emrin Epopeja e UÇK-së ndër vite ka zënë vend në institucionet e Kosovës e deri sot kur po e shënojmë 26-vjetorin e saj”, tha Kurti.

Ai tha se Kosova është çliriuar nga Serbia pikërisht nëpërmjet trashëgimisë politike që e prodhoi personalitetin dhe figurën e Adem Jasharit.

“Nga kjo trashëgimi është ngritur dhe po ndërtohet e po forcohet edhe shteti ynë”, tha Kurti.

Ai tha se rezistenca e Jasharëve është unike në vetvete, por që ka bazë historike duke iu referuar edhe Lidhjes Shqiptare të Prizrenit.

Kurti shtoi se në historinë e çlirimit të Kosovës, Adem Jashari zë një vend kryesor.

“E në këtë histori të çlirimit dhe shtetndërtimit, Adem Jashari dhe krejt çka përfaqëson figura e tij ka një hise shumë të madhe që në të vërtetë është hisja më e madhe që mund ta ketë një njëri një historinë e kombit të tij”, tha ai.