Takimi i kryenegociatorëve, nga Qeveria e Kosovës thonë se bëhet për zbatim të Marrëveshjes bazë

Klisman Kadiu, këshilltar i zëvendëskryeministrit Besnik Bislimi, këtë të premte është shprehur se takimi i ardhshëm në dialog në nivel kryenegociatorësh do të ketë në fokus diskutimet për avancimin e zbatimit të Marrëveshjes në rrugën drejt normalizimit si dhe Aneksin Zbatues.

“Pas takimit të 5 marsit të javës së kaluar me emisarin Lajçak, zëvendëskryeministri Bislimi ka pranuar një ftesë nga ai, për takimin e radhës në kuadër të procesit të dialogut, në nivel kryenegociatorësh, për të martën e ardhshme. Ftesa potencon si fokus të agjendës së diskutimeve avancimin e zbatimit të Marrëveshjes në rrugën drejt normalizimit si dhe Aneksin Zbatues. Kosova u përgjigjet pozitivisht ftesave, të cilat kanë për qëllim përqendrimin në rrugën përpara e zbatimin e marrëveshjeve në kuadër të procesit të dialogut, të cilat duhet të çojnë drejt normalizimit të marrëdhënieve dhe finalizimit të procesit. Qasja jonë konstruktive duhet të njihet me konstruktivitet e bashkëpunim dhe nga pala tjetër”, ka shkruar ai.

Ndërkohë, më herët këtë të premte Bashkimi Evropian e ka konfirmuar caktimin e datës së këtij takimi, duke thënë që mes tjerash do të diskutohet edhe për çështjen e dinarit.