Borrell për Marrëveshjen e Ohrit: Do të bëjmë presion ndaj Kosovës dhe Serbisë

Foto sc

Përfaqësuesi i Lartë i Bashkimti Evropian për Politikë të Jashtme dhe Siguri, Josep Borrell, në prag të nisjes së takimit ministror të Këshillit të Punëve të Jashtme të BE-së ka folur për marrëveshjen e arritur në mes të Kosovës dhe Serbisë, më 18 mars të vitit të kaluar.

Borrell ka thënë se do të vazhdojnë me presionin ndaj të dyja palëve që kjo marrëveshje të zbatohet.

“Sot është përvjetori i parë i Marrëveshjes së Ohrit. Koha po fluturon dhe tashmë është bërë një vit prej kur kishim arritur marrëveshjen mes Kosovës dhe Serbisë, në mënyrë që ato të lëviznin përpara drejt normalizimit, për fat të keq, përkundër mbështetjes së gjerë ndërkombëtare dhe të Bashkimit Evropian, Serbia dhe Kosova kanë arritur shumë pak progres”, ka thënë ai, transmeton albinfo.ch.

Tutje ai ka deklaruar se së shpejti do të ketë një takim të radhës në Bruksel në nivelin e kryengeociatorëve.

“Së shpejti do të kemi takimin tjetër të kryenegociatorëve këtu në Bruksel. Më vjen keq se kjo marrëveshja, e cila ishte shumë vështirë të arrihej, nuk është zbatuar. Do të vazhdojmë të bëjmë presion ndaj të dyja palëve, në mënyrë që të lëvizin përpara. Por, një vit më vonë, zbatimi nuk ka qenë aq sa unë kisha pritur të jetë”, ka thënë ai.