Ali Ahmeti, Qytetar Nderi i Prizrenit

Vendimi u mor nga Asambleja Komunale e Prizrenit më 28 mars

Kryetari i Bashkimit Demokratik për Integrim, Ali Ahmeti, është shpallur sot “Qytetar Nder” i Komunës së Prizrenit.

Ceremonia solemne u mbajt sot, ku morën pjesë shumë personalitete të shquara politike.

Ata vlerësuan lart kontributin e Ahmetit, shkruajnë mediat e Kosovës, përcjell albinfo.ch.

Të gjithë folësit në seancë thanë se ish-anëtari i Shtabit të Përgjithshëm të UÇK-së dhe ish-lideri politik i Ushtrisë Çlirimtare Kombëtare, për 40 vjet ka qenë në funksion të shqiptarëve, fillimisht në Kosovë dhe pastaj edhe në Maqedoninë e Veriut.

Në fjalën e tij, Ali Ahmeti u shpreh tejet i nderuar me këtë titull. Ahmeti tha se “Lidhja na e ka mbajtur shpirtin gjallë”.

“Na e ka mbajtur shpirtin gjallë, sepse na ka mësuar se si të mos jepemi dhe të ndërtojmë program deri në çlirim, sepse vetë Lidhja e Prizrenit ishte një platformë për çlirimin e tokave shqiptare”, tha Ahmeti në fjalën e tij të rastit.

Ndërkaq, kryetari i Komunës së Prizrenit, Shaqir Totaj, tha se “Qyteti i Lidhjes” di t’i nderojë njerëzit të kalibrit sikur të kreut të BDI-së.

“Për më tepër, edhe vetë prezanca e z. Ahmeti me bashkëpunëtorë dhe familjen e tij e ka nderuar edhe Prizrenin”, tha Totaj.

Vendimi u mor nga Asambleja Komunale e Prizrenit më 28 mars.

---