MPJD e konfirmon ndalesën e patriarkut serb

Derisa Serbia vazhdon me mosprespektim të marrëveshjeve nuk ka aprovim të vizitave, ka thënë Ministria e Punëve të Jashtme dhe Diasporës, duke konfirmuar se ia ka refuzuar vizitën në Kosovë patriarkut të Kishës Ortodokse Serbe, Porfirije.

Në njoftimin e lëshuar MPJD thekson se Serbia nuk është duke vazhduar respektimin e marrëveshjeve bazike që i ka nënshkruar me Kosovën, transmeton Albinfo.ch.

“Përderisa Serbia vazhdon të shkelë marrëveshjen e Brukselit, të mos lejojë vizitat e zyrtarëve tanë shtetërorë në Serbi dhe për më tepër të mos ndalet me fushata kundër Republikës së Kosovës në arenën ndërkombëtare, si në proceset integruese, ashtu edhe ato të njohjes, të vazhdojë të përdorë gjuhë të urrejtjes dhe kërcënime kundër Republikës së Kosovës dhe përfaqësuesve të saj, nuk do të lejohen vizitat as nga ana jonë”, thuhet në njoftim.

Tutje theksohet se ashtu siç dihet, Serbia ka krijuar grup ministror për ta shkelur marrëveshjen bazike dhe për të penguar anëtarësimin e Republikës së Kosovës në Këshillin e Evropës dhe përderisa vazhdon me këtë qasje dhe luftë me çdo mjet kundër Kosovës nuk do këtë aprovim te vizitave të tilla.

“Ne inkurajojmë Serbinë që të zbatojë marrëveshjen bazike dhe të veprojë me reciprocitet në raport me Kosovën dhe vizitat e ndërsjella”, thuhet në njoftim./Albinfo.ch