Kombëtarja e Zvicrës u prit nga mijëra persona në Zuerich, flasin Xhaka e Shaqiri

(KEYSTONE/Laurent Gillieron)

Skuadra që e përfaqësoi Zvicrën në Kampionatin Evropian, është pritur pasditen e sotme nga mijëra njerëz në Zuerich.

Tifozët janë shprehur shumë të kënaqur me paraqitjen e futbollistëve pavarësisht faktit që Zvicra dje u eliminua nga Anglia në çerekfinale të Euro 2024, transmeton albinfo.ch.

“Mendoj se të gjithë lojtarët ishin brilantë. Por Xhaka sidomos më ka impresionuar që ka luajtur përkundër lëndimit. Kjo dëshmon cilësitë e liderit”, ka thënë një nga të pranishmit.

Prej lojtarëve i pari që foli ishte kapiteni Granit Xhaka.

“Faleminderit për përkrahjen, qoftë sot apo edhe në stadiume. I kemi ndier përkrahjen dhe euforinë. E kemi shtyrë veten deri në limite dhe mund të jemi krenarë për këtë. Pa dyshim se është e dhimbshme, por skuadra dhe i gjithë stafi në përgjithësi kanë dhënë paraqitje shumë të mirë. Mund ta shohim se njerëzit janë shumë krenarë me ne”, ka deklaruar Xhaka para mijëra të pranishmëve.

Tutje Xherdan Shaqiri ka thënë se Zvicra ka treguar se mund të përballet me ekipe të mëdha.

“Të gjithë ishin të uritur për suksese. Ka shumë lojtarë të rinj që kanë avancuar shumë. Ne nuk jemi më Zvicra e vogël. Kemi treguar edhe një herë tjetër se mund të përballemi me ekipe të mëdha”, ka thënë fillimisht Shaqiri.

>>>Video<<<