Kurti e Clarck në CNN: Serbia kërkon veriun

Me tone të forta iu drejtua audiencës amerikane Kryeministri i Kosovës, Albin Kurti. Serbia nuk e njeh shtetin e Kosovës dhe, si rrjedhojë, po bëjnë dy luftra hibride ndaj tyre.

Kështu u shpreh Kryeministri i Kosovës, Albin Kurti, në një intervistë për gjigantin amerikan CNN. Në krah të Kurtit ishte edhe gjenerali amerikan, Wesley Clark, arkitekti i çlirimit të Kosovës.

Në intervistën e gjatë, Kurti përmendi faktin se Serbia ka angazhuar 48 baza operative rreth kufirit të Kosovës, duke pritur për një dritare të re të mundësive. Kurti theksoi se faktin se po kërkon nga partnerët perëndimorë t’i bëjnë presion Beogradit në mënyrë që të çaktivizojë këto 48 baza operative, transmeton A2Cnn, përcjell albinfo.ch.

Politikisht Serbia, sipas Kurtit, është shumë e ngjashme me Federatën Ruse. Ata nuk i njohin siç duhet fqinjët ata u shkaktojnë probleme fqinjëve të tyre sepse duan zgjerim, theksoi kryeministri i Kosovës.

Nga ana e tij, ish gjenerali amerikan, Clark qëndrimet e fundit të Serbisë kundër Kosovës i lidh me luftën e Rusisë në Ukrainë.

“Serbia është krahu i Rusisë në Ballkan. Serbia i shërben interesit të Rusisë. Vuçiç përpiqet të duket sikur po luan me të dyja palët, por kur të vijë momenti, ai do të bëjë atë që Putini dëshiron që ai të bëjë dhe ajo që ai dëshiron nga Putini është, natyrisht, autoriteti për të përdorur forcat e tij në Kosovë dhe të paktën të marrë gjysmën veriore të Kosovës”, theksoi Clark.

Clark dhe Kurti folën për Samitin e NATO-s, rëndësinë e tij dhe të ardhmen e Ukrainës. Sipas tyre parandalimi më i mirë i zotit Putin është futja e Ukrainës në NATO. Dhe sa më shpejt ta bëjmë, aq më mirë.