Të hënën protestohet “Për Identitet dhe Dinjitet” në Bujanoc

Të hënën do të shqiptarët do të mbajnë protestën “Për identitet dhe Dinjitet” nga ora 11:00 në sheshin e Bujanocit në Serbi.

Siç ka bërë të ditur deputeti i vetëm shqiptar në Parlamentin e Serbisë, Shaip Kamberi protesta mbahet për të reaguar ndaj presioneve të institucioneve serbe.

“Kur në këtë fushatë të shprehjes së urrejtjes antishqiptare marrin pjesë edhe zyrtarë më të lartë shtetërorë siç ishte A.Vulin (dhe rasti i tij në Gjykatën e lartë në Beograd, e cila e liroi nga përgjegjësia nga padia e Këshillit kombëtar shqiptar  për “nxitje të urrejtjes antishqiptare”, vendim ky që e legalizoi termin ofendues “shiptari”) arrestimi i një qytetari të zakonshëm, pak ditë para mbajtjes së protestës popullore në Bujanoc, nuk paraqet tjetër veç tentativë për frikësim të atyre që po organizojnë dhe atyre që dojnë të marrin pjesë në këtë protestë”, ka sqaruar Kamberi.

Ai ka shtuar se qytetarët po tentohet të frikësohen.

“Këto ditë ky nuk është rasti i vetëm i frikësimit të qytetarëve. Poashtu mësohet se disa qytetarë shqiptarë janë marrë në të ashtuquajturat “biseda informative” për “xhihadizëm”. Këto raste lënë të dyshojmë se politika zyrtare në Serbi po tenton edhe me këto masa represive të tërhjekë vëmendjen e opinionit të brendshëm dhe të jashtëm nga protesta legale e legjitime e paralajmëruar për realizimin e të drejtave fundamentale”, ka njoftuar ai.