Fillimi i vitit shkollor, Policia e Kosovës bën thirrje për kujdes

Policia e Kosovës ka bërë thirrje për kujdes të shtuar në trafik me fillimin e vitit të ri shkollor.

“Në prag të fillimit të vitit të ri shkollor, Policia e Kosovës apelon për një përgjegjësi të shtuar nga të gjithë pjesëmarrësit në trafik. Në zonat pranë shkollave dhe ku janë vendosur tabelat njoftuese si “Kujdes, shkolla” dhe “Këmbësorë,” është jetike që të gjithë të tregojnë kujdes maksimal. Fëmijët janë më të brishtë dhe të paparashikueshëm në lëvizje, kështu që shpejtësia e ulët, vëmendja e lartë dhe respektimi i sinjalistikës rrugore mund të shpëtojë jetë”, thuhet në njoftimin e Policisë së Kosovës.

Tutje kërkohet shumë kujdes sidomos ndaj fëmijëve më të vegjël.

“Këtë vit, veçanërisht kujdes të veçantë duhet të tregojmë për fëmijët që shkojnë në shkollë për herë të parë. Këta fëmijë janë më të pafajshëm dhe më të papërvojë në rrugë, ndaj është detyra jonë të sigurojmë që udhëtimi i tyre drejt shkollës të jetë sa më i sigurt dhe i mbrojtur”, thuhet nga policia.

Viti i ri shkollor në Kosovë ka nisur sot.