Gallup: 58 për qind e kosovarëve, të gatshëm për luftë

Përqindja e kosovarëve për ta mbrojtur atdheun (58 për qind) është gatishmëria më e lartë e qytetarëve në Ballkan për të mbrojtur shtetin e tyre në rast se kanoset rreziku

Rreth 58 për qind të qytetarëve të Kosovës janë të gatshëm të luftojnë nëse vendi i tyre përfshihet në luftë. Kjo konsiderohet gatishmëria më e lartë e qytetarëve në Ballkan për të mbrojtur atdheun e tyre në rast se kanoset rreziku. Përveç Kosovës, në Maqedoni 38 për qind e qytetarëve thanë se janë të gatshëm të luftojnë për shtetin e tyre.

Kështu thuhet në hulumtimin e WIN/Gallup International që ka realizuar në 64 vende të botës.

Hulumtimi tregon se ka diferenca në gatishmërinë e qytetarëve për mbrojtjen e vendit të tyre në rajonin tonë. Kështu, Bullgaria është në nivelin më të ulët me 25 për qind të gatishmërisë për luftë, Maqedonia me 38 për qind, Serbia me 46 për qind, Greqia me 54 për qind, Bosnja e Hercegovina me 55 për qind dhe Kosova me 58 për qind.

Sipas rezultateve nga hulumtimi i bërë në terren gjatë muajve shtator-dhjetor të vitit 2014, në çdo vend, janë anketuar 1000 burra dhe gra ballë për ballë, është vërejtur dallimi i dukshëm në raport me qëndrimet e qytetarëve në vendet e Evropës Lindore dhe nga Evropa Perëndimore, raporton INA.

Dy herë më shumë të anketuarit nga Evropa Lindore respektivisht 54 për qind janë të gatshëm të luftojnë për vendin e tyre në krahasim me ata nga Evropa Perëndimore, të cilët janë 25 për qind. Megjithatë, më i theksuar është dallimi tek vendet e Lindjes së Mesme dhe Afrika Veriore, të cilët në 83 për qind tregojnë gatishmëri për luftën.

Në nivel global, 52 për qind e grave të anketuara në këtë hulumtim janë të gatshëm të kyçen në mbrojtjen e vendit në rast lufte, në krahasim me 67 për qind të burrave. Në Maqedoni gatishmëri të këtillë kanë treguar 33 për qind e grave dhe 43 për qind e burrave.