Dy shfaqje nga Kosova në Paris

Të dy shfaqjet janë me tekst të Jeton Nezirajt dhe regji të Blerta Nezirajt

Një fundjavë e plotë është rezervuar në Paris, në teatrin e mirënjohur Thatre-Studio, në Alfortville, për dy produksionet teatrore të Qendrës Multimedia, “Kthimi i Karl Majit” dhe “The Handke Project”.

Gjithsej katër shfaqje do të jepen në dy termine, më datat 9 dhe 10 nëntor.

“Kthimi i Karl Majit” është prodhim i Qendrës Multimedia në bashkëpunim me Teatrin Volksbuhne të Berlinit, ndërsa është dhënë premierë në Teatrin Kombëtar të Kosovës në Prishtinë në tetor të vitit 2020, teksa “The Handke Project” është prodhim i Qendrës Multimedia në bashkëpunim me Teatrin Kombëtar të Pergolas dhe Festivalin Mittelfest (Itali), Teatrin e Dortmundit (Gjermani), Teatrin Kombëtar të Sarajevës & Festivalin Scene MESS (Bosnjë e Hercegovinë), ndërsa është dhënë premierë në qershor të vitit 2022.

Të dy shfaqjet kanë pasur turne të suksesshëm në teatro prestigjioze në Gjermani, Itali, Çeki, Rumani, Austri, Bosnjë e Hercegovinë, Serbi, Maqedoni e Veriut, Shqipëri, ndërsa këtë herë në një ngjarje të veçantë do të luhen së bashku në Teatrin Studio në Paris.

Të dy shfaqjet janë me tekst të Jeton Nezirajt dhe regji të Blerta Nezirajt, ndërsa tek “Kthimi i Karl Majit” luajnë Edona Reshitaj, Adrian Morina, Armend Smajli, Ylber Bardhi e Shpëtim Selmani, teksa tek “The Handke Project” luajnë Arben Bajraktaraj, Ejla Bavcic, Adrian Morina, Anja Drljevic dhe Verona Koxha.

Për më shumë detaje:

https://www.theatre-studio.com/saison/projet-handke-retour-karl-may

---