Kurti: Rashiq u kërcënua vazhdimisht nga Radoiçiqi me mesazhe

Foto: Albin Kurti

Kryeministri i Kosovës, Albin Kurti ka thënë se ndërhyrja e Serbisë në zgjedhjet parlamentare të 9 shkurtit është ndërhyrje në sovranitet dhe demokraci të vendit. 

Kurti ka thënë se vetë Nenad Rashiqi “është kërcënuar vazhdimisht nga Milan Radoiçiqi  dhe njerëzit e tij me anë të mesazheve”. 

“Ndërhyrja e Serbisë në zgjedhjet tona parlamentare është ndërhyrje në sovranitetin dhe demokracisë sonë”, ka thënë Kurti. 

Kryeministri i Kosovës ka shtuar se Serbia është angazhuar sidomos për ta dëmtuar subjektin politik të udhëhequr nga Nenad Rashiq, si dhe nga Aleksandar Arsenijeviq. 

Ai ka thënë se joshja financiare është bërë me anë të ndarjes së 20 mijë dinarëve për të gjithë të papunët. 

Sipas Kurtit, presidenti serb Aleksandar Vuçiq, e ka autorizuar kryeterroristin Milan Radoiçiq, për ta zbatuar planin për ndërhyrje në Kosovë. 

“Presidenti i Serbisë e ka autorizuar kryeterroristin Radoiçiq për ta zbatuar planin për ndërhyrje në Kosovë. Janë kërcënuar përmes Ivan Zaporozhac që do të kenë pasoja nëse nuk e votojnë Listën Serbe”, ka thënë ai.