PDK: Kosova ka nevojë për institucione të reja sa më parë

Foto: Partia Demokratike e Kosovës - PDK

Partia Demokratike e Kosovës (PDK) mbajti sot mbledhjen e rregullt të Kryesisë, ku u diskutua mbi zhvillimet politike pas zgjedhjeve të 9 shkurtit dhe hapat e ardhshëm pas caktimit të datës së konstituimit të Kuvendit nga Presidentja e Republikës më 15 prill.

Sipas njoftimit për media, Kryetari i PDK-së, Memli Krasniqi, informoi anëtarët e Kryesisë për komunikimet e fundit me partitë parlamentare, përveç atyre në pushtet (Vetëvendosje, Guxo dhe Alternativa). Ai theksoi se, nëse partia fituese e zgjedhjeve nuk arrin të sigurojë shumicën e nevojshme për formimin e qeverisë, PDK-ja është e gatshme të marrë përgjegjësinë për krijimin e ekzekutivit të ri me Bedri Hamzën si kryeministër, transmeton albinfo.ch.

PDK-ja ka deklaruar se do të veprojë në përputhje të plotë me Kushtetutën dhe parimet demokratike, duke shmangur çdo veprim që mund të pengojë funksionimin institucional gjatë seancës konstituive të Kuvendit.

“Ne kemi objektiva të qarta për zhvillimin ekonomik, rikuperimin dhe forcimin e marrëdhënieve me partnerët tanë strategjikë, si dhe avancimin e procesit të integrimit euroatlantik. PDK-ja ka kapacitetin dhe vizionin për ta çuar Kosovën përpara,” deklaroi Kryetari Krasniqi.

Nga ana e tij, kandidati për kryeministër nga PDK-ja, Bedri Hamza, ritheksoi përkushtimin e tij për të realizuar vizionin për një Kosovë më të zhvilluar dhe më të mirë për të gjithë qytetarët.

Në përfundim të mbledhjes, PDK-ja përsëriti qëndrimin se vendi duhet të ketë sa më parë institucionet e reja, në mënyrë që të adresohen çështjet kyçe për qytetarët dhe të përmbushen prioritetet shtetërore, transmeton albinfo.ch.