Gjenevë: Mësuesit protestojnë kundër rregullores së re për orarin e punës

Një pjesë e stafit mësimdhënës në Gjenevë ka hyrë sot në grevë për të protestuar ndaj një rregulloreje të re të Departamentit të Arsimit Publik (DIP), e cila, sipas tyre, rrezikon të rrisë ngarkesën e punës pa konsultim të duhur me palët e prekura, shkruan RTS, transmeton albinfo.ch.

Sipas sindikatave, direktiva e re u jep autoriteteve më shumë fuqi për të ndryshuar mënyrën e llogaritjes së orëve të punës dhe përjashton aspekte thelbësore të punës mësimore, si detyrat edukative, nga koha e konsideruar si mësimdhënie. Kjo, thonë ata, çon në rritje reale të ngarkesës së punës dhe në shtrembërim të rolit të mësuesit.

“Bëhet fjalë për një logjikë kontabël që nuk pasqyron kompleksitetin e profesionit tonë,” u shpreh Waël Almoman, përfaqësues i Sindikatës së Mësuesve të Shkollave të Mesme të Gjenevës. Ai shtoi se greva po ndiqet nga 20 deri në 30 mësues për shkollë, me një pjesëmarrje të vlerësuar në 15 deri në 20 përqind, transmeton albinfo.ch.

Nga ana tjetër, DIP e hedh poshtë këtë interpretim, duke deklaruar se nuk do të ketë rritje të ngarkesës së punës dhe se numri i orëve mësimore dhe i orëve vjetore të punës mbetet i pandryshuar.

Ndërkohë, sindikatat paralajmërojnë se do të vazhdojnë aksionin sindikal nëse autoritetet nuk ulen në dialog serioz për të shqyrtuar ndikimin real të reformës mbi punën dhe mirëqenien e mësimdhënësve, transmeton albinfo.ch.