Kosovë: KEK-u garanton furnizim me energji për fundjavë

Korporata Energjetike e Kosovës (KEK) ka siguruar qytetarët se gjatë fundjavës nuk do të ketë ndërprerje të energjisë elektrike, duke hedhur poshtë raportimet për mungesë totale të prodhimit vendor, transmeton albinfo.ch.

Në një konferencë për media, kryeshefi ekzekutiv i KEK-ut, Gramos Hashani, ka theksuar se të gjitha masat janë marrë për të siguruar prodhimin e nevojshëm, duke përfshirë edhe vënien në funksion të njësisë A3 të shtunën. “Ne vetëm e prodhojmë energjinë dhe e deklarojmë një ditë përpara. Konsumatorët nuk duhet të shqetësohen, pasi nuk do të ketë ndërprerje,” tha Hashani.

Ai sqaroi se KEDS-i dhe KESCO janë të obliguara të sigurojnë sasinë shtesë përmes importit nëse ka nevojë, por shtoi se “nuk do të ketë importim të energjisë në vlerë 100%”, duke theksuar se do të ketë prodhim vendor të mjaftueshëm për të përballuar një pjesë të konsumit.

Hashani gjithashtu mohoi raportimet se Kosova nuk do të prodhojë asnjë megavat energji gjatë ditës, duke theksuar se maksimumi i konsumit të enjten ka qenë 500 megavatë në orë, ndërsa në fundjavë pritet të bjerë ndjeshëm.

KEK-u, sipas tij, është në proces të modernizimit dhe rritjes së kapaciteteve prodhuese, çka pritet të ndikojë pozitivisht në stabilitetin afatgjatë të furnizimit me energji.

Më herët gjatë ditës, KESCO kishte lëshuar një njoftim alarmues, duke paralajmëruar për mungesë të prodhimit vendor dhe rrezik për mbështetje të plotë në import, çka e shtyu kompaninë të bëjë thirrje për kursim urgjent të energjisë nga konsumatorët, transmeton albinfo.ch.