Lara Gut-Behrami i jep fund karrierës si skiatore, zhvendoset në Angli

Keystone

Skiatorja e njohur zvicerane Lara Gut-Behrami, kampione olimpike dhe botërore, ka paralajmëruar largimin e saj nga skena e sportit pas Lojërave Olimpike Dimërore “Milano-Cortina 2026”. Një vendim i rëndësishëm, që ajo e lidh ngushtë me të ardhmen profesionale të bashkëshortit të saj, Valon Behrami.

Në një intervistë për “20 Minuten”, Gut-Behrami tregon se sezoni i ardhshëm do të jetë ndoshta i fundit për të. Ajo do të vazhdojë të garojë deri në Olimpiadën e ardhshme dimërore, por më pas synon të largohet nga sporti aktiv.

Pas përfundimit të sezonit në Itali, çifti planifikon të zhvendoset në Angli. Arsyeja kryesore: Valon Behrami do të marrë një rol drejtues në klubin e futbollit anglez FC Watford, për të cilin kishte luajtur më parë gjatë karrierës së tij si futbollist. Sipas Gut-Behrami, kjo është një mundësi e shkëlqyer për bashkëshortin e saj, të cilën ajo e mbështet me gjithë zemër.

“Nuk mund ta përjashtoj mundësinë që ta përfundoj karrierën pas Lojërave Olimpike 2026”, ka thënë ajo, duke shtuar se do të vazhdojë të merret me sport në një formë tjetër, por jo më si skiatore profesioniste,shkruan 20 minute , percjell albinfo.ch

Për momentin, Gut-Behrami dhe Behrami jetojnë në Udine, Itali. Por me përfundimin e angazhimeve sportive, një jetë e re pritet t’i presë në Londër.