Në Cyrih testohen robotët për shpërndarjen e ushqimit nga restorantet

Në lagjen Oerlikon të Cyrihut ka nisur një fazë eksperimentale për shpërndarjen e ushqimeve nëpërmjet robotëve autonomë. Projekti është zhvilluar nga RIVR, një spin-off i Politeknikut Federal të Cyrihut (ETHZ), dhe për momentin përfshin shpërndarjen e porosive nga një restorant lokal, shkruan albinfo.ch.

Gjatë 30 ditëve të para, robotët shoqërohen nga operatorë për arsye sigurie, ndërsa më pas do të kontrollohen nga distanca.

Këta automjete inovative janë të pajisur me katër gjymtyrë që u mundësojnë të përballojnë shkallët dhe me rrota për lëvizje nëpër hapësira urbane. Ata mund të lëvizin me shpejtësi deri në 15 km/h, janë të dukshëm falë dritave dhe një flamurthi, dhe përdorin inteligjencë artificiale për të shmangur pengesat dhe për t’u përshtatur me mjedisin.

Të krijuar për të funksionuar edhe në kushte atmosferike të pafavorshme, këta robotë konsiderohen si një hap i ri në logjistikën urbane. Synimi është që testimi i tillë të zgjerohet në qytete të tjera evropiane gjatë këtij viti, me mundësi përdorimi edhe për fusha të tjera, si tregtia me pakicë.