Presidentja Osmani: Kushtetuta e Kaçanikut, themel i Republikës së Kosovës

“Kushtetuta e Kaçanikut ishte shkëndija që mbajti gjallë shpresën dhe qëndresën, si dhe themeli mbi të cilin u ngrit Republika e Kosovës”

Presidentja e Kosovës, Vjosa Osmani permes një mesazhi të publikuar sot ka përkujtuar  35-vjetorin e miratimit të Kushtetutës së Kaçanikut.

Ajo me këtë rast është shprehur se më 7 shtator 1990, delegatët e Kuvendit të Kosovës hodhën themelet mbi të cilat u ngrit Republika e Kosovës.

“Kushtetuta e Kaçanikut ishte shkëndija që mbajti gjallë shpresën dhe qëndresën, si dhe themeli mbi të cilin u ngrit Republika e Kosovës”, ka thënë tutje Osmani.

Presidentja ka theksuar se ky akt historik ishte më shumë sesa një dokument juridik, ishte një betim kolektiv për lirinë e vendit. “Ky akt sublim ishte më shumë se një dokument juridik, ishte betim që Kosova do të jetë e lirë dhe e pavarur në mesin e kombeve të tjera të lira”, është shprehur ajo.

Presidentja Osmani përfundoi mesazhin e saj me një homazh për guximin dhe vizionin e delegatëve të asaj kohe:

“Sot, përulemi me nderim para atyre që guxuan atëherë kur duhej të rrezikonin gjithçka dhe me krenari vazhdojmë rrugën që ata trasuan”, tha Osmani.

Kushtetuta e Kaçanikut u miratua më 7 shtator 1990 nga delegatët shqiptarë të Kuvendit të Kosovës, si një hap historik drejt shpalljes së pavarësisë dhe rezistencës kundër regjimit të atëhershëm serb.

---