Vjosa Osmani dekoron presidentin e FIFA-s, Gianni Infantino, ia dedikon medaljen legjendës Fadil Vokrri

Gianni Infantino është dekoruar me Medaljen e Nderit nga presidentja Vjosa Osmani.

Presidenti i FIFA-s, Gianni Infantino, është dekoruar me Medaljen e Nderit nga presidentja e Kosovës, Vjosa Osmani, në një ceremoni të organizuar të mërkurën në Prishtinë.

Infantino foli pasi mori medaljen, duke thënë se për të është nder i madh që nderohet nga një vend i mrekullueshëm si Kosova.

“Është nder i madh dhe kënaqësi e madhe, emocion i madh e lumturi e madhe që të jem këtu në shtëpinë time, në Kosovë. Dhe ta pranoj këtë nder të madh, këtë medalje nga ju, presidentja e Republikës së Kosovës, mikesha ime, në emër të një vendi të mrekullueshëm si Kosova”.

“Kosova sot dhe Prishtina sot është kryeqyteti i botës apo jo? I botës së futbollit… por siç e dimë të gjithë, futbolli është gjëja më e rëndësishme në botë, kështu që është kryeqyteti i botës”, tha Infantino.

I pari i futbollit botërorë këtë medalje ia dedikoi ish-presidentit të FFK-së, Fadil Vokrrit.

“Do të doja t’ia dedikoj këtë medalje, këtë nder e mirënjohje Fadil Vokrrit. Dhe të gjithë popullit të Kosovës në Kosovë e jashtë saj,” tha Infantino, duke treguar emocionet e tij për këtë nder dhe për takimet që ka pasur me legjendën kosovare të futbollit.