Tragjedia në Lucca, dalin detaje të reja për vdekjen e familjes shqiptare

Zhvillime të reja për tragjedinë në Itali, familja shqiptare u shua nga monoksidi i karbonit

Policia italiane kanë bërë të ditur identitetin e katër anëtarëve të një familjeje shqiptare që humbën jetën si pasojë e helmimit nga monoksidi i karbonit në banesën e tyre në zonën e Luccës, në Itali, transmeton albinfo..ch.

Viktimat janë babai A.K. (48 vjeç), nëna J.K. (43 vjeçe), si dhe dy fëmijët e tyre, djali H.K. (22 vjeç) dhe vajza X.K. (15 vjeçe).

Një person i pestë, vëllai i kryefamiljarit, ka arritur të shpëtojë, por ndodhet në gjendje kritike shëndetësore. Ai kishte shkuar në banesë pasi familja nuk po u përgjigjej thirrjeve telefonike dhe kishte alarmuar autoritetet për situatën, transmeton tutje albinfo.ch.

Gjatë ndërhyrjes në vendngjarje, dy karabinierë që ofruan ndihmën e parë kanë pësuar gjithashtu helmim të lehtë, por sipas autoriteteve shëndetësore, ata janë jashtë rrezikut për jetën.

Ngjarja tragjike është regjistruar në orët e mbrëmjes së të mërkurës, kur ekipet e emergjencës hynë në banesë dhe u përballën me një skenë të rëndë.

Sipas raportimeve, tryeza ishte e shtruar, ndërsa katër anëtarët e familjes u gjetën pa shenja jete brenda shtëpisë.

Në vendngjarje ishte i pranishëm edhe kryetari i bashkisë së Porcarit, i cili shprehu tronditjen e tij për ngjarjen dhe solidaritetin me komunitetin, duke theksuar se tragjedia ka prekur thellë gjithë qytezën, e cila ndodhet vetëm disa kilometra larg qytetit të Luccës.

Prokuroria italiane ka nisur hetimet për zbardhjen e plotë të rrethanave të ngjarjes.

Autoritetet po hetojnë nëse kaldaja ishte e regjistruar dhe e instaluar sipas standardeve teknike, si dhe nëse i ishte nënshtruar kontrolleve të rregullta.

Banesën ku ndodhi tragjedia e kishte në pronësi A.K., i cili, sipas dëshmive, e kishte blerë atë rreth tre vjet më parë, ndërsa familja ishte zhvendosur aty vetëm kohët e fundit./Albinfo.ch

---