Shaqiri shënon në derbin e zjarrtë të Zvicrës

Shaqiri ishte i saktë nga penalltia në minutën e 90-të për 1:1

Ylli shqiptar, Xherdan Shaqiri ka shënuar gol në derbin e zjarrtë ndërmjet Baselit dhe Zurichut.

Baseli fitoi në fund 2:1 derbin ndaj Zurichut në ndeshjen e vlefshme për xhiron e 23-të të Superligës zvicerane, përcjell albinfo.ch.

Baseli ishte në disavantazh prej një goli deri në minutën e 90-të por brenda gjashtë minutave shënoi dy herë për t’i dhënë fund ecurisë prej tri disfatave radhazi.

Shaqiri ishte i saktë nga penalltia në minutën e 90-të për 1:1. Në sekondat e fundit, Ibrahim Salah, e shënoi golin e fitores 2:1.

Futbollisti shqiptar, Shaqiri, e kompletoi ndeshjen dhe ishte prej më të mirëve në fushë. Ndërkohë bashkëlojtari i Shaqirit, Dion Kacur, u detyrua ta lë fushën në minutën e 63-të për shkak të një lëndimi.

Te Zurichu ndeshjen e kompletuan Bledian Krasniqi dhe Lindrit Kamberi.

Për 34-vjeçarin Shaqiri ishte goli i 15-të këtë edicion. Ka edhe 13 asistime.

Baseli ka 39 pikë dhe renditet në pozitën e katërt. Zurichu e zë vendin e nëntë me 25 pikë.

---