Albulena Haxhiu nis punën në Presidencë

Albulena Haxhiu nis punën si ushtruese detyre, pritet me lule në Presidencë

Ushtruesja e detyrës së Presidentit të Kosovës, Albulena Haxhiu, është mirëpritur nga stafi i Presidencës në ditën e parë të punës së saj në këtë institucion, përcjell albinfo.ch. 

Në një video të publikuar nga vetë Haxhiu në Facebook, ajo shihet duke pranuar një tufë me lule nga administrata e Presidencës, e cila i uroi mirëseardhje dhe suksese në këtë detyrë të lartë shtetërore.

“Në emër të gjithë stafit të administratës, ju uroj mirëserardhje e pastaj suksese në marrjen e një pozite aq të lartë shtetërore”, thuhet në urimin e bërë gjatë pritjes.

Në fjalën e saj, Haxhiu theksoi rëndësinë e përkushtimit institucional dhe kërkoi që secili në Presidencë të japë më të mirën, në mënyrë që përgjegjësitë të përmbushen në përputhje me Kushtetutën dhe legjislacionin në fuqi.

“Po më vjen shumë mirë që po ju takoj dhe jam shumë e bindur se bashkëpunimi jonë ka me qenë shumë i mirë”, u shpreh ajo.

Mandati i presidentes Vjosa Osmani përfundoi më 04.04.2026, ndërsa në mungesë të zgjedhjes së presidentit të ri, detyrën përkohësisht e ka marrë kryetarja e Kuvendit, Albulena Haxhiu.

Ndërkohë, kanë mbetur edhe 21 ditë afat sipas vendimit të Gjykatës Kushtetuese për zgjedhjen e Presidentit të Kosovës, por deri tani nuk është arritur asnjë marrëveshje mes partive politike.

Albulena Haxhiu priti Drejtoreshën e QKRMT për mbështetjen e të mbijetuarve të dhunës seksuale

Ushtruesja e detyrës së Presidentes së Kosovës shpreh përkushtimin institucional për mbrojtjen e të drejtave dhe dinjitetit të viktimave të luftës.

Sot, Albulena Haxhiu pati kënaqësinë të presë në takim Feride Rushiti, Drejtoreshën Ekzekutive të Qendra Kosovare për Rehabilitimin e të Mbijetuarve të Torturës (QKRMT).

Gjatë takimit, Haxhiu e falënderoi znj. Rushiti për angazhimin e palodhshëm dhe përkushtimin e jashtëzakonshëm në mbështetje të të mbijetuarve të dhunës seksuale gjatë luftës. Ajo theksoi rëndësinë e këtij misioni jo vetëm për të mbijetuarit dhe shoqërinë, por edhe për forcimin e drejtësisë dhe dinjitetit në Kosovë.

Në këtë kontekst, ushtruesja e detyrës së Presidentes siguroi znj. Rushiti se do të ketë mbështetjen e saj të plotë dhe të institucioneve në çdo përpjekje për avancimin e të drejtave, dinjitetit dhe mirëqenies së të mbijetuarve të luftës. Ky angazhim vjen si pjesë e përpjekjeve për të garantuar që viktimat të marrin mbështetjen dhe drejtësinë që meritojnë.

/Albinfo.ch

---