Në Zvicër riciklimi i qelqit ka orar të caktuar: ja rregullat që duhet të respektohen

Hedhja e shisheve lejohet vetëm në intervale të caktuara për të ruajtur qetësinë e lagjeve dhe respektin ndaj banorëve.

Në shumë qytete të Zvicrës, riciklimi i qelqit nuk lejohet në çdo kohë të ditës, por vetëm brenda orareve të përcaktuara. Shishet dhe kavanozët duhet të hidhen në kontejnerët e posaçëm zakonisht nga e hëna deri të shtunën, shpesh mes orës 07:00 dhe 20:00, përcjell albinfo.ch.

Ky rregull është vendosur për një arsye praktike: qelqi krijon zhurmë gjatë hedhjes në kontejnerë, ndërsa në Zvicër respektimi i qetësisë së lagjes dhe pushimit të banorëve konsiderohet shumë i rëndësishëm.

Për këtë arsye, riciklimi i qelqit jashtë këtyre orareve, si gjatë natës, të dielave apo festave zyrtare, mund të sjellë edhe gjoba.

Megjithatë, ky kufizim nuk lidhet me mungesën e kujdesit për mjedisin, por me mënyrën e organizimit dhe disiplinës që karakterizon sistemin zviceran të riciklimit, ku qëllimi është ruajtja e rendit dhe respekti ndaj komunitetit./Albinfo.ch

---