Foda takohet me talentin e Salzburgut, Arion Selimi, mundësi për Kosovën

Përzgjedhësi i Kosovës, Franco Foda, po vazhdon të ndjekë nga afër lojtarët e rinj që mund të jenë pjesë e ardhshme e kombëtares dardane.

Ai së fundmi ka qëndruar në Austri, ku në qendrën stërvitore të RB Salzburgut është takuar me talentin Arion Selimi, raporton lajmi.net.

Gjatë takimit, ata kanë publikuar edhe një fotografi së bashku, gjë që është parë nga tifozët si një shenjë pozitive se mesfushori i ri mund të zgjedhë të përfaqësojë Kosovën në të ardhmen.

Selimi luan në mesfushë dhe është pjesë e akademisë së Salzburgut, ku ka qenë aktiv me grupmoshat U16 dhe U18 të klubit austriak.

Ky takim shihet si pjesë e përpjekjeve të Federatës së Futbollit të Kosovës për të afruar sa më shumë talente të reja në ekipin kombëtar.