Dyshime për vdekjen e një foshnjeje në Zvicër nga qumështi i kontaminuar

@unsplash

Një rast i dyshimtë i vdekjes së një foshnjeje është raportuar në Zvicër në kuadër të skandalit të qumështit të kontaminuar me toksinën cereulide.

Sipas mediave zvicerane, foshnja nga kantoni St. Gallen kishte konsumuar qumësht pluhur për bebe që rezultoi pozitiv për praninë e toksinës cereulide. Autoritetet zvicerane u njoftuan për rastin më 11 shkurt.

Familja kishte vërejtur simptoma të ngjashme me ato që shkaktohen nga ekspozimi ndaj cereulides, përfshirë të vjella të forta. Foshnja më pas ndërroi jetë nga septicemia, një gjendje e rëndë që ndodh kur sistemi imunitar reagon në mënyrë ekstreme ndaj një infeksioni, raporton rts transmeton albinfo.ch.

Rasti lidhet me skandalin ndërkombëtar të qumështit të kontaminuar, i cili në fillim të vitit shkaktoi tërheqje masive të produkteve në rreth 60 shtete, duke përfshirë marka të njohura si Nestlé dhe Danone.

Produkti në fjalë ishte qumështi Aptamil, i prodhuar nga Danone. Ky produkt nuk tregtohej në Zvicër, por familja e kishte blerë në Austri. Kutia e prekur nuk ishte pjesë e tërheqjeve zyrtare në atë kohë dhe më vonë nuk u përfshi në listën e produkteve të rikthyera.

Hetimet laboratorike zbuluan se qumështi përmbante vaj të prodhuar nga nënkontraktori kinez Cabio Biotech, kompania që konsiderohet burimi i këtij skandali. Megjithatë, autoritetet deklaruan se niveli i toksinës së gjetur ishte nën kufirin që Autoriteti Evropian për Sigurinë Ushqimore (EFSA) e konsideron të rrezikshëm për shëndetin.

Sipas Zyrës Federale Zvicerane për Sigurinë Ushqimore dhe Çështjet Veterinare (FSVO), sasitë e zbuluara nuk konsiderohen të mjaftueshme për të shkaktuar pasoja negative për foshnjat.

Ekspertët theksojnë se aktualisht nuk ekziston ende një konsensus i plotë shkencor mbi efektet afatshkurtra dhe afatgjata të cereulides, sidomos në rastet e konsumit të përsëritur.

Pavarësisht kësaj, autoritetet zvicerane e trajtuan rastin me serioz maksimal. Kantoni i Cyrihut kërkoi urgjentisht nga Danone raportet e analizave dhe paralajmëroi se, në mungesë të dokumentacionit, mund të konfiskoheshin të gjitha produktet që përmbanin vajin ARA.

Hetimet për rastin vazhdojnë.