Vetëvendosje siguron edhe deputetin e 52-të nga votat e diasporës

Sipas rezultateve preliminare të zgjedhjeve të parakohshme për Kuvendin e Republikës së Kosovës, të përditësuara në orën 20:55 me 92.79% të vendvotimeve të procesuara, Lëvizja Vetëvendosje ka siguruar 52 ulëse në Kuvendin e Kosovës.

Sipas të dhënave zyrtare të publikuara nga Qendra e Numërimit dhe Rezultateve, subjekti fitues ka marrë gjithsej 346,371 vota, që përbëjnë 45.58% të votave të vlefshme, duke mbetur forca e parë politike në vend.

Sipas projeksioneve të përfshirjes së votave me postë, rezulton se këto vota kanë qenë vendimtare për konfirmimin e mandatit të 52-të për këtë subjekt politik, duke e forcuar pozicionin e tij në përbërjen e ardhshme parlamentare, transmeton albinfo.ch.

Ndërkohë, partitë e tjera kryesore kanë marrë këto rezultate preliminare:

Partia Demokratike e Kosovës (PDK) – 22 ulëse (20.08%)

Lidhja Demokratike e Kosovës (LDK) – 19 ulëse (17.12%)

Aleanca për Ardhmërinë e Kosovës (AAK) – 7 ulëse (6.92%)

Procesi i numërimit të votave vazhdon, ndërsa pritet që rezultatet përfundimtare të konfirmojnë shpërndarjen e mandateve pas përfshirjes së plotë të votave me postë.