Shqipëria

Arrestohet i dyshuari pasi vodhi Lamborghinin në Gjermani për ta shitur në Shqipëri

Policia e Shtetit ka parandaluar një rast të trafikimit të mjeteve motorike për shitje në Shqipëri.

Sipas njoftimit të policisë një person është arrestuar pasi që i njëjti kishte vjedhur një makinë Lamborghini në Gjermani dhe kishte synuar që ta shiste në Shqipëri.

Sipas Policisë më 13 korrik, në territorin e Shqipërisë ka hyrë një shtetas me një automjet të tipit “Lamborghini Huracán” e ky mjet nga shteti gjerman më datë 30 korrik të këtij viti është deklaruar i vjedhur.

“Shërbimet e Policisë pas kotrolleve të kryera, kanë konstatuar autmojetin dhe menjëherë bën bllokimin e tij. Në përfundim të veprimeve u bë arrestimi në flagrancë i shtetasit M.D., 38 vjeç, lindur në Elbasan dhe banues në Stuttgart, Gjermani, si i dyshuar për kryerjen e veprave penale ‘’Trafikimi i mjeteve motorike’’ dhe “Pastrimi i produkteve të veprës penale’’. Policia shpalli në kërkim për të njëjtat vepra penale, shtetasin B.M., 43 vjeç, banues në Gjermani (bashkëpuntor). Ata dyshohet se kanë bashkëpunuar për kryerjen e vjedhjes së automjetit luksoz në Gjermani me qëllim shitjen e tij në Shqipëri. Në cilësinë e provës materiale u sekuestrua automjeti tip “Lamborghini Huracán”, i cili ka një vlerë monetare rreth 250.000 euro”, thuhet në njoftimin e policisë.