Shkurt.ch

Arrestohet në Bullgari zvicerani me një arsenal të tërë armësh

Personi i cili ka dashur të udhëtojë në Siri me armë të shumta, përmes Turqisë dhe u arrestua nga autoritetet bullgare, është një banor i Kantonit Aargau. Nëse do të pasojnë negociata, mbetet e paqartë. Dyshohet se ai është i sëmurë psikisht

Të enjten, Prokuroria bullgare ka njoftuar se një zviceran është ndaluar në kufirin me Turqinë. Në automjetin e tij ishin zbuluar pushkë, 24 thika, një pistoletë dhe rreth 400 plumba. Fortesa rebele Idlib në Siri, ishte destinacioni përfundimtar i udhëtimit të tij. Ai u kishte thënë autoriteteve se atje do të ndihmonte civilët, shkruan “Sonntagblick”, përcjell Albinfo.ch.

Sipas “Sonntagsblick”, bëhet fjalë për një person 30-vjeçar nga rrethi Suhr i Aargaut. Ai duhet të ketë jetuar një jetë qytetare larg nga dhuna dhe të ketë qenë njeri familjar. Thuhet se ai ka qenë i angazhuar në departamentin e zjarrfikësve dhe gjithashtu i ka adhuruar kafshët dhe ka qenë “i interesuar për ndihma humanitare”, siç thotë ai.

Të premten ai është dashur të paraqitet para gjykatësit. Ky i fundit vendosi që 30-vjeçari të mbetet në paraburgim. Avokati i tij ka pohuar se personi është në gjendje të rënduar psikike dhe se duhet të transferohet në ndonjë klinikë. Tani mjekët do të vendosin nëse ai është i gatshëm psikikisht për seancë gjyqësore.

Personi po kërkohej pas një urdhërkërkese nga Zvicra. Babai i tij kishte alarmuar se djali i tij ishte zhdukur me automjet dhe se nga banesa po mungonin armët e zjarrit dhe municioni.

Prokuroria speciale e Bullgarisë e akuzon atë për terrorizëm dhe kontrabandë të armëve jashtë kufirit shtetëror.