Gjuha

Aty ku zëri i shqipes buçet

Festë me rastin e diplomimit të nxënësve të mësimit plotsues në gjuhën shqipe, LAPSH "NAim Frashëri" në Kantonin e Zürichut

LAPSH “N. Frashëri” në Kantonin e Zürichut, me rastin e përfundimit të vitit shkollor, organizoi një festë për të nderuar nxënësit që kryen shkollën shqipe të mësimit plotësues bashkë me prindërit e tyre.

Manifestimi u mbajt në “Rinora 4”, në Rumlag, të shtunën, më 2 korrik. Pronarët e kësaj salle lanë në dispozicion një ambient të mrekullueshëm në lokalin e tyre të famshëm për të nderuar punën e palodhshme të mësimdhënësve dhe për të respektuar vullnetin e prindërve që për shumë vjet dërguan fëmijët e tyre në mësimin shqip.

Festën e hapën më të vegjlit e shkollës shqipe të veshur me rroba kombëtare dhe të shoqëruar me muzikë shqipe, pas të cilëve vinin 26 nxënës që sivjet përfunduan mësimet dhe po përgatiten të shkojnë më tutje në shkollim në Zvicrën e shanseve të mëdha në mes të barabartëve. Janë këta fëmijë që më vonë do të jenë më të preferuarit dhe do t`i shohim si studentë në universitetet zvicerane. Këta fëmijë që me dijen, guximin dhe përgatitjen shkollore shumëgjuhëshe do të shkëlqejnë me suksese edhe më të mëdha në fusha të ndryshme.

Naser Ulaj, kryetar i LAPSH “N. Frashëri” Zürich, përshëndet të pranishmit

Me “Kënga e trimave” dhe “Luleborë”, të ekzekutuara me violinë nxënësja Hana Sabriu ishte nismëtare e këtij programi modest. Pastaj në skenë dolën nxënësit e mësueses Elfete Hasi me këngën “Duaje atdheun”.

Kryetari i LAPSH “N. Frashëri” për kantonin e Zürichut, Naser Ulaj, i përshëndeti të gjithë të pranishmit, duke i falënderuar nxënësit për sukseset e këtyre viteve dhe prindërit e pranishëm që kishin ardhur për të mbështetur fëmijët e tyre dhe për të falënderuar mësimdhënësit për punën e palodhshme me vite deri te kurorëzimi – ndarja e diplomave për suksesin e arritur.

Si mysafire në këtë festë suksesesh për nxënësit, prindërit dhe mësimdhënësit këndoi këngëtarja e mirënjohur Gentjana Tafili, e cila me zërin e saj melodik shtoi gëzimin dhe harenë në këtë festë.

Momenti me i bukur ishte dalja në skenë e 26 nxënësve që me sukses këto vite kishin ndjekur shkollën shqipe dhe ky sukses po kurorëzohej me marrjen e diplomave. Kështu me radhë në skenen e mbushur me lule që ata morën nga pasardhësit e tyre të veshur në rroba kombëtare pasi moren lulet, librat si dhuratë dhe diplomat u dorëzuan si simbolikë abetaret fillestarëve duke i shkëmbyer me lulet.

Kështu 8 nxësnësit e mësueses Elfete (Anesa, Arti, Ervini, Jonida, Laureta, Ramadani,Rilindi e Leodoniti), bashkë me 4 nxënës të mësuesit Naser (Aldinit, Aulones, Beratit dhe Shqiponjës) e 4 të tjerë të mësuese Afërdites (Vullneti, Dritoni, Fabiola e Albulena) e 4 të mësueses Sebahate (Aida, Anila, Eriona e Nafija) me 3 të Nexhart Malokut (Amisa, Besjana e Marlondi) e 1 te Dafina Hazirajt (Egzona), të cilëve pos diplomave, ish-kryetari i LAPSH për Zvicër, Nexhat Maloku, u dha edhe nga një libër dhuratë për sukseset e përgjithshme.

Prindër, nxënës dhe mësimdhënës, të buzqeshur dhe krenarë për sukseset e arritura

Në pjesën e dytë moderatorja lexoi vargjet e Gjergj Fishtes:
“Mallkue qoftë ai bir shqiptari
që këtë gjuhë të përendisë
trashëgim që na la i pari
trashëgim s ja len ai fmisë”, – vargje që për prindërit e këtushëm kthehen nga mallkimi në bekim pasi kanë përmbushur misionin kombëtar duke ua mundësuar fëmijëve të tyre shkollimin në gjuhën e nënës dhe paraqet variantin Fishtian:

Bekuar qoftë ai bir shqiptari
që këtë gjuhë të përendisë
trashëgim që na la i pari
trashëgim ja len ai fëmisë.

Variant që u duartrokit nga prindër, nxënës e mësimmdhënës të pranishëm që kishin përmbushur misionin e tyre për gjuhën te këta fëmijë.


Arsimtarët që për 3 dekada s’u ndalën me kontributin e tyre të përcojnë zërin e fuqishëm të gjuhës shqipe te gjeneratat që po rriten larg atdheut

Në fund nënkryetari i LAPSH “N. Frashëri”, Gëzim Kasumaj, i përshëndeti prindërit, nxënësit e mësimdhënësit dhe i falënderoi pronarët e lokalit “Rinora4” për ndihmën dhe mirëkuptimin që patën për ta ndihmuar LAPSH-in që në ambiente komode të realizojë këtë manifestim madhështor.


Programi vazhdoi me këngët shkodrane të interpretes Gentjana Tafili, e shoqëruar me vallëzimin e prindërve, nxënësve dhe mësimdhënësve. Festë që për nga atmosfera i përngjante një gëzimi familjar, ku secili e ndiente veten po aq të lumtur me sukseset e këtyre fëmijëve, të cilët edhe pse në mërgim, pa përtesë me vite të tëra u përpoqën ta ruajnë dhe ta kultivojnë gjuhën e tyre të bukur dhe të ruajnë e cmojnë kulturën dhe identitetin e tyre.

Vallëzimi vazhdoi deri vonë

Teksti: Hamzë Morina
Fotot: Lulzim Hasi


LAJME INTERESANTE NGA INTERNETI