Berset: “Brenda pak javësh do të kemi zbutje të mëtejshme të masave”

Për shembull, brenda pak javësh mund të kufizohet detyrimi për të mbajtur maskë, ka thënë ai në një intervistë për "SonntagsZeitung"

Ministri i Shëndetësisë Alain Berset ka njoftuar sot se nëse pandemia në Zvicër zhvillohet në mënyrë të favorshme, së shpejti do të kemi një zbutje të mëtejshme të masave.

Për shembull, brenda pak javësh mund të kufizohet detyrimi për të mbajtur maskë, ka thënë ai në një intervistë për gazetën e të dielës “SonntagsZeitung”, botimi online i së cilës ka dalë të shtunën

Por, situata është akoma konfuze këto ditë. Prandaj kalimi në fazën e normalizimit, siç ishte planifikuar më parë, nuk është i parashikueshëm për momentin.

“Ne kemi aktualisht variantin Delta që është më ngjitës, transmeton albinfo.ch. Po ashtu tani shumë njerëz që kthehen nga pushimet, gjë që rrit rrezikun e infektimit në Zvicër”, tha Berset. Fëmijët dhe të rinjtë së shpejti do të takohen përsëri në shkollë dhe mund të shpejtojnë edhe më shumë përhapjen. “Tani duhet të shohim se si ndikon kjo në numrin e rasteve.”

Masat mbrojtëse

Berset është shprehur megjithatë në favor të “pak kufizimeve, si detyrimi për mbajtje të maskës në transportin publik ose dyqane dhe detyrimi për certifikatë në ngjarje të mëdha ose në klube”. Është ende shumë heret që Covid-i të lejohet të “shëtisë” si një grip normal, transmeton albinfo.ch. Një gjë e tillë mund të lejohet vetëm nëse mun dtë përjashtohet rreziku i mbingarkesës së spitaleve. Dhe për fat të keq, nuk është kështu për momentin.”

Edhe nëse situata përkeqësohet përsëri, Këshilli Federal synon të heqë dorë nga mbylljet.

Vaksinimi i detyrueshëm nuk është në rend dite

Për ministrin Berset, masat e detyrueshme për të rritur kuotën e vaksinimit, si vaksinimi i detyrueshëm për personelin infermieror, analog me Francën, janë jashtë diskutimit. Në vend të kësaj, sipas Ministrit të Shëndetësisë, në plan të parë janë informacioni më i specifikuar dhe “ofertat me prag të ulët”.

Kështu, sipas tij, kantonet mund të krijojnë, për shembull, stacione mobile të vaksinimit në dyqane, përcjell albinfo.ch. “Njerëzit që duan të blejnë aty, thjesht mund të vaksinohen”.

Në Zvicër, sipas Zyrës Federale të Shëndetit Publik (BAG), deri të premten 48.9 përqind e popullsisë është vaksinuar plotësisht. Kjo shkallë është nën mesataren në krahasim me vendet fqinje.

---