Bllokohen sheshet e Prishtinës, nuk lejohet lëvizja e qytetarëve

Në sheshet “Skënderbeu”, “Nënë Tereza” dhe “Zahir Pajaziti” policia ka vendosur shirita, duke pamundësuar lëvizjen.

Është bërë e ditur se sheshet e Prishtinës janë mbyllur përkohësisht për qytetarët, për shkak të situatës së krijuar nga koronavirusi, raporton ekonomiaonline.

Në sheshet “Skënderbeu”, “Nënë Tereza” dhe “Zahir Pajaziti” policia ka vendosur shirita duke pamundësuar lëvizjen.

Po ashtu, pjesëtarë të Policisë janë vendosur në sheshe për të ndaluar qytetarët që po kalojnë.

Ndërmjet shesheve policia ka lërë korridoret e ndara për kalimin e qytetarëve.

Zëdhënësja e Komunës së Prishtinës, Miranda Mullafazliu, ka thënë se mbyllja e shesheve në Prishtinës është në kompetencë të Qeverisë.

“Mbyllja e shesheve është bërë me urdhër të Qeverisë së Kosovës. Ajo i merr këto vendime”.

Lidhur me këtë rast, ka reaguar edhe kryetari i Prishtinës, Shpend Ahmeti.

“Thirrjet për të mos dalë pa nevojë nuk po respektohen nga qytetarët. Aq më pak tash, që edhe moti po përmirësohet. Masat shtesë të sigurisë janë të domosdoshme.

Në këtë fazë, sheshet nuk mund të përdoren si hapësira të shëtitjes! Ministria e Shëndetësisë, në bashkëpunim me Komunën e Prishtinës dhe institucionet e tjera relevante janë koordinuar dhe dakorduar për kufizimin e shëtitjeve nëpër sheshe.

Falënderojmë Policinë e Kosovës për veprimin e shpejtë, duke kufizuar lëvizjet nëpër sheshe. Kanë mbetur të hapura vetëm korridoret e domosdoshme.

Për ta ruajtur veten, familjen dhe shëndetin publik – #rriNshpi!”.

/Albinfo.ch

 

---