Archives

SWISS sheh rënie të fitimit operativ në mes të vitit

Posted on by erezzaademi

SWISS Airlines pa një rënie të fitimit të saj operativ të rregulluar me më shumë se një të katërtën në gjashtë muajt e parë të vitit, në 195.1 milionë CHF (240 milionë dollarë). Dega e Lufthansa tha të enjten se duhet të tregohet kujdes në gjysmën e dytë të vitit financiar.

Në gjysmën e parë të vitit, të ardhurat operative mbetën praktikisht të qëndrueshme në 2.69 miliardë CHF, ashtu si edhe numri i pasagjerëve, në 8.5 milionë. U operuan mbi 70,000 fluturime, 1.8% më shumë se në vitin e kaluar. Faktori mesatar i ngarkesës ra me 1.8 pikë përqindjeje në 80%.

Vetëm në tremujorin e dytë, të ardhurat totale operative arritën në 1.47 miliardë CHF, duke shënuar një rënie prej 1.2% nga viti në vit.

Mjedisi doli i vështirë, i shënuar nga tensione gjeopolitike dhe tregtare. “Rritja e kostove, veçanërisht për personelin dhe tarifat, ndikoi gjithashtu ndjeshëm në fitimprurësinë tonë, transmeton albinfo.ch. Kufizimet strukturore, të tilla si mungesat e vazhdueshme të avionëve, motorëve dhe pilotëve, gjithashtu ndikuan në rezultatet tona”, citohet të ketë thënë Drejtori Financiar Dennis Weber në një njoftim për shtyp.

Kërkesa nga klasat jo-premium në rrugët transatlantike është dobësuar, me një ndikim të menjëhershëm në të ardhurat mesatare.

Nga ana pozitive, trendi i çmimeve të karburantit ka qenë i favorshëm. Përveç kësaj, linja ajrore arriti të përmirësojë saktësinë e saj, me 72.4% të fluturimeve që u nisën në kohë, një rritje prej 3.9 pikësh përqindjeje krahasuar me gjysmën e parë të vitit 2024. Në segmentin e ngarkesave, dorëzimet e hershme të mallrave për shkak të mosmarrëveshjeve doganore mbështetën performancën, shkruan swissinfo.

Kërkohet kujdes, si për pjesën tjetër të vitit ashtu edhe për vitin 2026, pasi presionet e kostove vazhdojnë dhe mjedisi mbetet i paqëndrueshëm. “Ne po vazhdojmë të përqendrohemi në kontrollin e kostove dhe investimet e synuara në stabilitet, cilësinë e produktit dhe inovacionin”, tha CEO Jens Fehlinger.

Karin Keller-Sutter: Pavarësisht krizave, “Zvicra ende po ecën mirë”

Posted on by erezzaademi

Presidentja e Konfederatës Zvicerane, Karin Keller-Sutter mbështet një Zvicër të qëndrueshme në një botë në krizë. Në një intervistë me RTS, gjatë përgatitjes së festës së 1 gushtit, Ministrja e Financave diskutoi konfliktin izraelito-palestinez, pranoi shkurtimet e subvencioneve dhe e vendosi AHV-në dhe ushtrinë në qendër të prioriteteve federale.

Për intervistën tradicionale të 1 gushtit, Presidentja Zvicerane Karin Keller-Sutter priti RTS në shtëpinë e saj në Wil (SG). Një imazh me fotografi, që pasqyron një Zvicër paqësore ku moti duket shqetësimi i vetëm, një ishull stabiliteti në zemër të një bote në krizë.

Pavarësisht tensioneve aktuale – Lindja e Mesme, Ukraina dhe detyrimet doganore – ky imazh vazhdon, thotë ajo, të ketë ndikim. “Zvicra ende po ecën mirë, më mirë se vendet e tjera, përfshirë disa vende evropiane. Ne kemi pika të forta: federalizmin, lirinë, demokracinë e drejtpërdrejtë dhe financa pak a shumë të shëndetshme. Ne kemi asete që është e rëndësishme të mos i rrezikojmë.”

Për zgjidhjen me dy shtete

Lidhur me luftën në Gaza, Zvicra është zotuar me fjalë, por jo ende me vepra. A mund të presim së shpejti njohjen e Palestinës apo sanksione kundër Izraelit? Presidentja e Konfederatës Zvicerane përsërit qëndrimin e Zvicrës: duke bërë thirrje për respektimin e ligjit ndërkombëtar, lirimin e pengjeve, rikthimin e ndihmës humanitare dhe mbështetjen për zgjidhjen me dy shtete. Sipas saj, është shumë herët për njohjen e Palestinës, e cila do të vijë në një fazë të mëvonshme, në “fund të procesit”.

Në të njëjtën kohë, ajo këmbëngul se Departamenti Federal i Punëve të Jashtme po vazhdon përpjekjet e tij diplomatike prapa skenave. Diskrecioni zviceran, ndonjëherë i keqkuptuar nga popullsia, thuhet se është një kusht për efektivitetin diplomatik: “Altoparlanti nuk funksionon në politikën e jashtme”, pohon Këshilltarja Federale, e cila përmend edhe përpjekje të tjera prapa skenave në favor të Ukrainës, veçanërisht për negociatat e mundshme të paqes në Gjenevë, transmeton albinfo.ch.

Në luftë kundër subvencioneve

Në frontin e brendshëm, Karin Keller-Sutter thotë se dëshiron të pastrojë një buxhet federal që ajo e përshkruan si një “makinë subvencionesh”. “Pothuajse 80% e buxhetit janë pagesa transferimi: kjo do të thotë që taksapaguesi po financon subvencione kudo”, ankohet ajo. Sipas saj, nuk bëhet fjalë për shkurtime me çdo kusht, por për ngadalësimin e rritjes së shpenzimeve, e cila është “më e shpejtë se rritja e të ardhurave”. Për ta arritur këtë, disa subvencione do të duhet të rishikohen.

Këto shkurtime, veçanërisht në Rini + Sport dhe disa programe parandaluese të FOPH, kanë tërhequr kritika. “Konfederata nuk mund të financojë gjithçka. Në fushën e parandalimit, për shembull, detyra u takon kantoneve”, përgjigjet ajo.

Prioritete të reja: AVS dhe ushtria

Prioritetet duhet të ripërcaktohen: “Sot, këto prioritete janë, nga njëra anë, financimi i AHV, në veçanti pensioni i 13-të, dhe, nga ana tjetër, shpenzimet ushtarake”. Por në fund të fundit, thekson ajo, i takon Parlamentit, sovranit të vetëm në çështjet buxhetore, të vendosë.

Shpesh e quajtur “grua e fortë”, ajo buzëqesh: “Kur një burrë është i fortë, mendojmë se është mirë. Për një grua, është e frikshme. Por këto janë klishe me të cilat duhet të jetojmë.” Megjithatë, ajo pranon se roli i saj si Ministre e Financave është shumë i rëndësishëm për të. “Financat e shëndetshme janë baza e suksesit të Zvicrës. Ne gjithashtu duhet të përgatitemi për krizat dhe të mos bëjmë siç bëjnë shtetet e tjera me borxhe të mëdha. Përndryshe, janë të rinjtë ata që do të duhet të paguajnë.”

Çfarë pritet nga Gjykata Kushtetuese?

Posted on by erezzaademi

Gjykata Kushtetuese duhet të sqarojë me terma të prerë mënyrën e votimit të kryetarit të Kuvendit të Kosovës, si dhe të tregojë se afati 30-ditor për konstituimin e Kuvendit nuk është konsumuar.

Kështu vlerëson Zahir Çerkini, profesori i të Drejtës Kushtetuese në Universitetin “Isa Boletini” në Mitrovicë.

Ai pret që Gjykata Kushtetuese ta ritheksojë se zgjedhja e kryetarit dhe nënkryetarëve të Kuvendit duhet të bëhet me votim të hapur të deputetëve.

“Kështu edhe e tha Gjykata (më 26 qershor), por e tha me terma më kushtetues. Pres të jetë më e hapur, më e artikuluar në drejtim të obligimit që institucionet të ulen dhe të votojnë në mënyrë të hapur për konstituimin e Kuvendit, zgjedhjen e kryetarit dhe nënkryetarëve të Kuvendit”, thekson Çerkini për Radion Evropa e Lirë.

Për t’i sqaruar çështjet kushtetuese lidhur me konstituimin e Kuvendit, Gjykatës Kushtetuese i janë drejtuar Partia Demokratike e Kosovës (PDK), Lidhja Demokratike e Kosovës (LDK) dhe presidentja e vendit, Vjosa Osmani.

Ata janë në pritje të një vlerësimi të ri të Gjykatës Kushtetuese, pasi vendimi i saj i 26 qershorit nuk arriti të sqaronte në mënyrë të prerë rrugën për konstituimin e Kuvendit.

Gjykata Kushtetuese, më 26 qershor, u dha 30 ditë afat deputetëve të Kuvendit të Kosovës për konstituimin e Kuvendit.

Por, pas 52 përpjekjeve, ata nuk arritën ta përmbyllin këtë proces.

Presidentja e Kosovës ka kërkuar nga Gjykata Kushtetuese sqarimin e pasojave juridike të moskonstituimit të Kuvendit brenda afatit kushtetues prej 30 ditësh.

Kërkesa është regjistruar si lëndë e veçantë nga ana e gjykatës.

Çerkini shpreh mendimin se Gjykata Kushtetuese duhet ta konfirmojë se ky afat duhet të rikthehet në pikën e rrjedhjes, aty ku rendi i ditës së seancës ka devijuar.

“Pres nga Gjykata Kushtetuese që të tregojë se afati 30 ditësh nuk është konsumuar ende, për faktin se nuk është shkuar në atë që ka thënë Gjykata, pra që të shkohet në votim për zgjedhjen e kryesisë së Kuvendit, pra për konstituimin e Kuvendit, por vazhdimisht është tentuar që të votohet Komisioni (për votim të fshehtë)”, thotë Çerkini.

Sipas tij, kjo nënkupton që afati i caktuar nga Gjykata Kushtetuese për konstituimin e Kuvendit, të rikthehet në proces e sipër, në ditën kur kryesuesi i seancës konstituive, Avni Dehari ka ndryshuar rendin e ditës, duke kërkuar votimin e Komisionit për votim të fshehtë.

Idenë e Komisionit për votim të fshehtë, Dehari e propozoi më 1 maj, duke u kërkuar partive politike nga një anëtar për komisionin për votimin e fshehtë.

Deri atëherë, në vazhdimet e seancës konstituive të Kuvendit, e cila nisi më 15 prill, e propozuara nga Lëvizja Vetëvendosje për kryetare të Kuvendit, Albulena Haxhiu, disa herë nuk arriti t’i marrë 61 votat e nevojshme të deputetëve për këtë post, përmes votimit të hapur.

Partitë tjera kryesore, Partia Demokratike e Kosovës, Lidhja Demokratike e Kosovës, dhe Aleanca për Ardhmërinë e Kosovës (AAK), në vazhdimësi kanë refuzuar votimin e fshehtë dhe propozimin e anëtarëve për Komisionin për votim të fshehtë.

Më 24 korrik, Gjykata Kushtetuese vendosi masë të përkohshme, që nënkupton se nga 27 korriku deri më 8 gusht deputetët nuk duhet të veprojnë për të konstituuar Kuvendin e Kosovës.

Veprimet e Deharit dhe kandidatura e përsëritur

Në fillim të korrikut, PDK-ja i është drejtuar për vlerësim Gjykatës Kushtetuese, duke kontestuar kërkesën e Lëvizjes Vetëvendosje për propozime për anëtarë të Komisionit për votim të fshehtë; hedhjen në votim të këtij komisioni; vetë votimin e komisionit; si dhe ndërprerjen e seancës pas mosmiratimit të komisionit.

Po ashtu, LDK-ja i ka kërkuar Gjykatës Kushtetuese t’i sqarojë normat kushtetuese dhe të rregullores së punës së Kuvendit të Kosovës, në lidhje me vazhdimin e seancës konstituive nga 29 qershori, pas aktgjykimit të 26 qershorit. Kjo parti beson se vazhdimet e fundit të seancës konstituive janë bërë “në kundërshtim të plotë” me Kushtetutën e Kosovës, si dhe me konstatimet e aktgjykimit të Gjykatës Kushtetuese nga 26 qershori.

Gëzim Shala nga Instituti i Kosovës për Drejtësi (IKD), thotë për Radion Evropa e Lirë se nga Gjykata Kushtetuese pritet që të vlerësojë ligjshmërinë dhe kushtetutshmërinë e veprimit të kryesuesit të seancës konstituive të Kuvendit.

“Duhet sqaruar në mënyrë të prerë edhe veprimet e zotit Dehari, në cilësinë e kryesuesit të seancës së Kuvendit, për të përcaktuar dhe elaboruar shkeljet e bëra nga ana e tij deri më tani”, thekson Shala.

Ai shton se Gjykata Kushtetuese duhet ta elaborojë çështjen e të drejtës së propozimit të mandatarit për kryetar të Kuvendit, përkatësisht nëse Lëvizja Vetëvendosje, si parti me më së shumti vota, ka keqpërdorur këtë të drejtë duke propozuar në vazhdimësi të njëjtin emër, pavarësisht se nuk i ka siguruar votat e nevojshme për miratim.

“Gjykata Kushtetuese e ka theksuar se në këto raste kërkohet që të ketë kompromis për të vazhduar tutje dhe thjesht, Gjykata tash duhet të tregojë se si duhet proceduar tutje nëse nuk ka kompromis”, thekson Shala.

Mendim të ngjashëm ka edhe profesor Çerkini, i cili thotë se Gjykata Kushtetuese duhet të përcaktojë qartë se çfarë ndodh në rast se kandidati i njëjtë për kryetar të Kuvendit nuk i merr votat në disa tentime radhazi.

“Për të dalë nga kjo situatë, është mirë që Gjykata Kushtetuese mbase të tregojë edhe me enumeracion pozitiv (përshkrim konkret, me fakte dhe hollësi të numëruara njëra pas tjetrës) se sa herë një kandidat mund të jetë kandidat për kryetar të Kuvendit… të tregohet një numër i caktuar se sa herë, brenda sa ditësh, një emër mund të vendoset në kandidaturë”, thekson Çerkini.

Ai shtoi se sqarimi i tillë nuk nënkupton humbjen e të drejtës së partisë së parë fituese për ta propozuar kryetarin e Kuvendit.

Kushtetuesja “t’i përjashtojë zgjedhjet”

Në pamundësi për të siguruar votat për kryetare të Kuvendit, deputetja e Lëvizjes vetëvendosje, Albulena Haxhiu, qysh në muajin qershor hodhi idenë për mbajtjen e zgjedhjeve të jashtëzakonshme parlamentare, bashkë me ato lokale, më vonë këtë vit.

Kjo ide u përsërit edhe nga kolegia e saj partiake, Mimoza Kusari-Lila, e cila duke potencuar hezitimin e partive të caktuara për bashkëqeverisje, ka thënë se zgjidhje mund të jenë zgjedhjet e parakohshme.

Ajo, gjithashtu, e ka përmendur mundësinë e marrjes së mandatit të deputetëve të Kuvendit, si pasojë e pamundësisë që ta konstituojnë Kuvendin.

Mbajtja e zgjedhjeve të parakohshme parlamentare, për shkak të bllokimit të konstituimit të Kuvendit, ëshët parë si opsion i mundshëm edhe nga Partia Demokratike e Kosovës. Por, lideri i saj Memli Krasniqi, ka përjashtuar mundësinë që ato të mbahen bashkë me ato lokale këtë vit.

LDK-ja nuk e ka përmendur mundësinë e zgjedhjeve të parakohshme, ndërkaq AAK-ja ka thënë se nuk i kërkon ato, por është e gatshme, nëse zgjedhjet mbahen.

Profesor Çerkini thekson se Gjykata Kushtetuese nuk duhet fare të merret me këtë ide.

“Idenë se a mund t’iu merret mandati deputetëve nga ana e Gjykatës Kushtetuese, duke e dërguar vendin në zgjedhje… unë mendoj se Gjykata nuk duhet ta bëjë një gjë të tillë. Nuk i takon Gjykatës Kushtetuese që të ndërhyjë në pushtetin politik për të dërguar vendin në zgjedhje”, thotë Çerkini.

Me këtë pikëpamje pajtohet edhe Shala nga IKD-ja. Sipas tij, moskonstituimi i Kuvendit nuk është rrethanë e paraparë në Kushtetutën e Kosovës, e cila do të përcaktonte marrjen e mandateve të deputetëve.

Edhe pse nuk dihet saktësisht se cili do të jetë vendimi i Gjykatës Kushtetuese, Shala thotë se praktikat nga vendimmarrjet e kaluara të kësaj Gjykate tregojnë se nuk mund të ketë zgjedhje të reja përmes aktgjykimeve të saj.

“Vetë Gjykata Kushtetuese, më 2014, ka thënë se askund në Kushtetutë nuk thuhet se moszgjedhja e kryetarit të Kuvendit e çon vendin në zgjedhje. Mirëpo, nuk e dimë nëse Gjykata Kushtetuese do ta ndërrojë praktikën”, thekson Shala.

Të dy njohësit e çështjeve juridike – kushtetuese vlerësojnë se mbetet e pasigurt se kur Gjykata Kushtetuese mund të dalë me sqarime lidhur me kërkesat e parashtruara në adresë të saj nga PDK-ja dhe LDK-ja, si dhe nga presidentja Osmani.

Megjithtatë, marrë parasysh që më 8 gusht skadon afati i masës së përkohshme të Gjykatës Kushtetuese, e cila ndalon veprimin e deputetëve në drejtim të konstituimit të Kuvendit, ata presin që një vendimi i kësaj gjykate mund të shpallet para kësaj date./REL

Ndeshja Zvicër-Kosovë: Dalin në shitje biletat

Posted on by erezzaademi

Federata e Futbollit e Zvicrës ka njoftuar se nga sot kanë dalë në shitje biletat e ndeshjes kualifikuese mes kombëtares Helvetike dhe asaj të Kosovës.

Nga Zvicfra kanë njoftuar se biletat për ndeshjen kundër Kosovës janë në dispozicion ekskluzivisht online në faqen www.ticketmaster.ch nga ora 14:00 e ditës së sotme, 31 korrik, transmeton albinfo.ch.

Sipas njoftimit, biletat janë të disponueshme në kategori të ndryshme vendesh dhe çmimesh, duke përjashtuar tarifat që variojnë nga 25 franga (pas portës për të rinjtë deri në 16 vjeç) deri në 135 franga (vende Premium – Qendra Kryesore e Tribunës). Fëmijët deri në 6 vjeç janë falas dhe nuk kanë nevojë të blejnë biletë ndërsa duhet të ulen në prehrin e një të rrituri shoqërues.

Federata e Zvicrës ka njoftuar ] se biletat për sektorët zyrtarë për tifozët e Kosovës shiten ekskluzivisht përmes Federatës së Kosovës.

SFV rekomandon blerjen e biletave ekskluzivisht përmes www.ticketmaster.ch.

Banka Kombëtare Zvicerane raporton humbje prej 15 miliardë CHF në gjysmën e parë të vitit

Posted on by erezzaademi

Banka Kombëtare Zvicerane (SNB) pësoi humbje të mëdha në gjysmën e parë të vitit 2025. Në veçanti, dobësimi i dollarit amerikan që nga fillimi i turbulencës së tarifave në fillim të prillit pati një ndikim negativ në rezultat.

Në përgjithësi, SNB regjistroi një humbje prej 15.3 miliardë CHF (18.8 miliardë dollarë) në periudhën nga janari deri në qershor të vitit aktual. Sipas një deklarate të lëshuar të enjten, SNB regjistroi një humbje prej 22.7 miliardë CHF në pozicionet e saj në valutë të huaj, ndërsa zotërimet e saj në ar, të cilat mbetën të pandryshuara në aspektin e vëllimit, regjistruan një fitim vlerësimi prej 8.6 miliardë CHF. Ndërkohë, një humbje prej 1 miliard CHF u regjistrua në pozicionet e frangës zvicerane, transmeton albinfo.ch.

Pas një fitimi prej 6.7 miliardë CHF në tremujorin e parë, kjo rezulton në një humbje prej 22 miliardë CHF për tremujorin e dytë të vitit, shkruan swissinfo. SNB madje regjistroi një humbje prej 4.2 miliardë CHF në pozicionet e saj në ar në tremujorin e dytë për shkak të dollarit të dobët.

Dobësia e dollarit kundrejt frangës zvicerane është qartësisht arsyeja kryesore për rezultatin negativ. Ndërsa tregjet e aksioneve u rikuperuan shpejt pas rënies në gjysmën e parë të prillit dhe në disa raste arritën nivele të reja, monedha amerikane mbeti e dobët.

Në fund të marsit, pak para “Ditës së Çlirimit” të Presidentit të SHBA-së Donald Trump, një dollar kushtonte plot 88 centime. Në fund të qershorit, ishte vetëm 79 centime. Euro gjithashtu u dobësua pak, por vetëm në 0.9340 CHF nga 0.9570 CHF.

Si zakonisht, SNB theksoi se rezultati i saj varet kryesisht nga zhvillimi i tregjeve të arit, këmbimit valutor dhe kapitalit. Prandaj, luhatjet e forta janë rregull dhe përfundimet nga rezultati i ndërmjetëm deri te rezultati vjetor janë të mundshme vetëm në një masë të kufizuar.

50 stacione treni në Zvicër nuk kanë akses për personat me aftësi të kufizuara

Posted on by Drin Reçica

Ligji zviceran ka kërkuar akses në trena që nga viti 2024, dhe flota InterCity (IC) 2000 e SBB-së – trena me dy kate për distanca të gjata që lidhin disa nga qendrat më të rëndësishme kombëtare – janë modernizuar në përputhje me rrethanat, përcjell albinfo.ch.

Megjithatë, 50 nga gjithsej 68 stacione ku ndalesat e IC 2000 nuk janë të aksesueshme për karrige me rrota ose pajisje të tjera për lëvizshmëri të reduktuar, sipas platformës kërkimore Infosperber.

Përfshirë janë qendrat qendrore si stacioni kryesor i Cyrihut, Bazeli, Berna, Lozana dhe Gjeneva, ndër të tjera.

Të gjitha këto stacione janë të listuara këtu.

Zvicër: Kostot e strehimit do të rriten me 5 përqind të tjera këtë vit

Posted on by Drin Reçica

Indeksi i Çmimeve të Pronave Rezidenciale në Zvicër (IMPI), i cili mat ndryshimet në çmimet e tregut për pronat rezidenciale, u rrit me 1.9 përqind në tremujorin e dytë të vitit 2025 – domethënë, midis prillit dhe korrikut, përcjell albinfo.ch.

Për të gjithë vitin 2025, Zyra Federale e Statistikave (FSO) parashikon një rritje prej 5 përqind.

Në tremujorin e dytë të vitit 2025, çmimet u rritën si për shtëpitë me një familje – 1.5 përqind – ashtu edhe për apartamentet (2.2 përqind), veçanërisht në të ashtuquajturat ‘komuna rurale’, domethënë, vende që nuk janë aq të populluara sa qendrat urbane.

Donikë Sejdiu mbron me sukses doktoratën në Universitetin e Cyrihut

Posted on by Drin Reçica

Donikë Sejdiu, studente me prejardhje nga Kumanova, ka mbrojtur me sukses të shkëlqyeshëm temën e doktoratës pranë Fakultetit të Shkencave Matematiko-Natyrore në Universitetin e Cyrihut, duke fituar titullin Doktore e Shkencave, shkruan albinfo.ch. 

Punimi i saj shkencor, me titull “Evolucioni i sistemeve patogjen–bimë përmes genomikës së herbariumit: raste studimore të patogjenit të urisë irlandeze të patates Phytophthora infestans dhe të patogjenit të zjarrit të shenjtë Claviceps purpurea”, u prezantua pas katër vitesh kërkimesh të thelluara dhe angazhimi të vazhdueshëm akademik.

Në një sallë të mbushur me profesorë, doktorantë dhe studentë të ciklit master, Donika mbajti një prezantim të nivelit të lartë profesional, i cili zgjati mbi 45 minuta dhe tërhoqi vëmendjen e veçantë të të pranishmëve. Gjatë sesionit të pyetjeve dhe diskutimeve, u vu re interesimi i lartë dhe vlerësimi për kontributin e saj kërkimor, që përbën një shtesë të rëndësishme në fushën e biologjisë molekulare dhe patologjisë së bimëve.

Vlen të theksohet se Donikë Sejdiu ka qenë edhe nxënëse e shkollës shqipe në Zvicër për nëntë vite me radhë, ku hapat e diturisë i mori edhe në gjuhën amtare. Rruga e saj akademike, nga komuniteti shqiptar në mërgatë deri te suksesi në një universitet prestigjioz ndërkombëtar, është frymëzim për brezat e rinj.

Ky shembull, dhe shumë të tjerë si Donika, dëshmojnë se të rinjtë shqiptarë janë gjithnjë e më shumë vlerë e shtuar jo vetëm për shoqërinë zvicerane, por edhe për vetë Atdheun. Me punë, përkushtim dhe arsimim cilësor, ata po japin dëshmi konkrete të potencialit që mbartin.

Komuniteti shqiptar në Zvicër dhe Atdheu krenohen me arritjen e Donikës, duke e parë atë si simbol të suksesit dhe përfaqësimit të denjë në botën shkencore ndërkombëtare.

 

 

Presidentja e Konfederatës do të mbajë fjalim në Rütli më 1 gusht

Posted on by Drin Reçica

Më 1 gusht, Këshilltarët Federalë do të jenë të zënë me fjalimet tradicionale që festojnë lindjen e vendit të tyre. Presidentja e Konfederatës, Karin Keller-Sutter, do ta mbajë të sajin në livadhin ikonik të Rütlit, përcjell albinfo.ch.

Këshilltari Federal Ignazio Cassis, përgjegjës për diplomacinë, pritet në brigjet e Liqenit të Lucernës, më saktësisht në Gersau, në kantonin e Schwyz, ndërsa shtesa më e fundit në kabinet, Martin Pfister, “Ministër” i Mbrojtjes, Sportit dhe Mbrojtjes Civile, do të marrë pjesë në një drekë në një fermë në Rimensberg në kantonin e St. Gallen, përpara se të shkojë në Amriswil (Thurgau) dhe, si ndalesë e fundit, në Fribourg, ku, ndër të tjera, përfundoi studimet e historisë.

Beat Jans, kreu i Departamentit të Drejtësisë dhe Policisë, do të mbajë gjithashtu tre fjalime, njësoj si kolegu i tij Pfister. Pasi ndalet në Schaffhausen në mëngjes, në mesditë ai do të udhëtojë për në Altdorf (Uri) përpara se ta përfundojë ditën në Windisch – Vindonissa e lashtë romake, vendi i një kampi legjionarësh – në Aargau.

Këshilltari Federal Albert Rösti, kreu i Departamentit të Mjedisit, Transportit, Energjisë dhe Komunikacionit, ka përpara një turne të vërtetë fuqie, me gjashtë fjalime që do të mbahen midis 31 korrikut dhe 1 gushtit.

Ditën e parë, pas një ndalese në Basse-Vendline në Jura, Rösti do të vazhdojë për në Lucernë. Të nesërmen ai do të jetë në Goms (Valais), përpara se të vazhdojë për në Pierrafortscha (Fribourg) dhe Les Planchettes (Neuchâtel) përpara se të përfundojë përpjekjet e tij në Oberbölchen (Bazel).

Elisabeth Baume-Schneider, drejtuese e Departamentit të Brendshëm, do të marrë gjithashtu dy ditë pushim më 1 gusht. Pas Rorschach, në kantonin e St. Gallen, më 31 korrik, të nesërmen do të mbahet në Delley (Fribourg) dhe më pas do të përfundojë me stil në komunën e Tresa në Ticino.

“Ministri” i ekonomisë, fermeri dhe prodhuesi i verës Guy Parmelin, do të mbajë fjalimin e tij të parë më 31 korrik në Fully (Valais), një komunë e njohur për prodhimin e verës. Të nesërmen, Parmelin pritet për një drekë në fermë në Stüdelihof (Solothurn) përpara se ta përfundojë ditën në Klosters, Graubünden.

Dënohet me 15 vjet burgim për krime lufte Millosh Pleskoviq

Posted on by Drin Reçica

Është dënuar me 15 vjet burgim Millosh Pleskoviq i akuzuar për krime lufte.

Ai akuzohet se gjatë vitit 1998-99 në Prizren në bashkëkryerje me një grup serbësh të armatosur kishin vrarë tre civilë shqiptarë dhe plagosur disa të tjerë, përcjell albinfo.ch.

Referuar aktakuzës së Prokurorisë Speciale e ngritur më 7 qershor 2024, Millosh Pleskoviq gjatë vitit 1998-99 në Prizren, në bashkëkryerje me persona të tjerë, ka shkelur rregullat e së drejtës ndërkombëtare kundër personave civilë, duke kryer vrasjen e viktimave.

Është dënuar me 15 vjet burgim Millosh Pleskoviq i akuzuar për krime lufte.

Pleskoviq akuzohet se gjatë vitit 1998-99 në Prizren në bashkëkryerje me një grup serbësh të armatosur kishin vrarë tre civilë shqiptarë dhe plagosur disa të tjerë.

Sipas aktakuzës së Prokurorisë Speciale e ngritur më 7 qershor 2024, Millosh Pleskoviq gjatë vitit 1998-99 në Prizren, në bashkëkryerje me persona të tjerë, ka shkelur rregullat e së drejtës ndërkombëtare kundër personave civilë, duke kryer vrasjen e viktimave.

Pavarësisht dallimeve politike, zviceranët ndajnë pesë vlera kryesore

Posted on by Drin Reçica

Një studim i ri nga Universiteti i Cyrihut nxjerr në pah një realitet që shpesh anashkalohet në diskursin politik zviceran: pavarësisht dallimeve midis partive politike, pesë parime kryesore vazhdojnë të gjenerojnë konsensus në të gjitha segmentet e popullsisë.

Ato janë:

Një model ekonomik i suksesshëm

Një Zvicër neutrale por e hapur

Respekti, debati konstruktiv dhe kërkimi i kompromisit që janë pjesë e politikës zvicerane

Bukuria natyrore e Zvicrës dhe nevoja për ta mbrojtur atë

Solidariteti, drejtësia dhe një angazhim për veprim humanitar

Pse është paraqitur Rozeta Hajdari në Prokurorinë Speciale?

Posted on by Drin Reçica

Ministrja në detyrë e Tregtisë dhe Industrisë, Rozeta Hajdari, po raportohet se është paraqitur për t’u intervistuar, sërish në Prokurorinë Speciale të Kosovës dhe sipas informacioneve të para, rasti lidhet me rezervat shtetërore.

Kujtojmë se kjo çështje u bë kryelajm në muajin gusht të vitit 2023, kur u raportua për keqpërdorimin e rezervave, për çka disa persona përfunduan në pranga të Policisë, në mesin e të cilëve edhe zyrtarë të ministrisë së Hajdarit.

Tetë muaj më vonë, në prill të vitit të kaluar, Hajdari ishte ftuar për intervistim nga Prokuroria Speciale, nën dyshimet se ka keqpërdorur detyrën zyrtare.

Në paraqitjen e saj para prokurorëve, ajo ishte mbrojtur në heshtje.

Gjermani: Studentët e Juridikut nga Universiteti i Prishtinës zënë vendin e 6-të në botë

Posted on by Drin Reçica

Studentët e Fakultetit Juridik të Universitetit të Prishtinës kanë arritur një sukses të jashtëzakonshëm në arenën ndërkombëtare, duke u renditur në vendin e 6-të në botë në garën prestigjioze juridike “Nuremberg Moot Court 2025”, transmeton albinfo.ch.

Rundet finale të garës u mbajtën nga 23 deri më 26 korrik 2025, në sallën historike Nr. 600 të Gjykatës së Nurembergut në Gjermani – vendin ku janë gjykuar figurat kryesore të regjimit nazist pas Luftës së Dytë Botërore.

Nga 140 ekipe pjesëmarrëse në fazën e parë të garës (shkrimi i memorandumeve), vetëm 40 ekipenga universitete prestigjioze ndërkombëtare u kualifikuan për rundet me gojë. Në mesin e tyre, edhe ekipi i Universitetit të Prishtinës, i cili jo vetëm që u kualifikua, por arriti të renditet në Top 6-shen botërore – një arritje që reflekton përgatitjen e thellë dhe cilësinë akademike të studentëve kosovarë në fushën e së drejtës penale ndërkombëtare.

Ekipi i Fakultetit Juridik ishte i përbërë nga studentet: Morea Pula, Liza Rexhepi, Enxhi Avdyli, Rea Hadri dhe Greta Spahiu, të cilat u përfaqësuan me dinjitet dhe profesionalizëm të lartë. Mentorimi i tyre u bë nga Nisa Ferati, e cila shoqëroi ekipin në Nuremberg, si dhe nga Ass. Besnik Beqaj dhe Argjira Asllani – pjesë e ekipit të mëhershëm të kësaj gare. Mbështetje të vazhdueshme ofroi edhe Prof. Avni Puka, dekan i Fakultetit Juridik të UP-së.

Ky rezultat tregon se Fakulteti Juridik i UP-së ka ndërtuar një traditë të qëndrueshme përfaqësimi në forume ndërkombëtare dhe po formon një gjeneratë të re juristësh të përgatitur për sfidat globale.

“Nuremberg Moot Court” është një prej garave më prestigjioze ndërkombëtare në fushën e drejtësisë ndërkombëtare penale dhe që nga viti 2022 është pjesë e përhershme e programit të Fakultetit Juridik, e financuar nga buxheti i dedikuar për gara ndërkombëtare. /Albinfo.ch

Itali: 22-vjeçar shqiptar kapet me 12 doza kokainë

Posted on by Drin Reçica

Raportohet se një 22-vjeçar shqiptar ka rënë në prangat e policisë italiane, pasi u kap duke kryer manovra të dyshimta me makinën e tij në rrugët e qytetit. Pasi u ndalua nga autoritetet, efektivët kryen një kontroll të imtësishëm në automjet, ku nën levën e frenave të dorës zbuluan 12 qese me kokainë të ndara në doza të vogla, përcjell albinfo.ch.

Gjatë kontrollit, policia gjeti dhe sekuestroi edhe 350 euro, të cilat dyshohet se janë përfituar nga shitja e drogës. I riu kishte gjithashtu dy telefona celularë, në të cilët u zbuluan biseda me persona që dyshohet se ishin blerës të lëndës narkotike.

Hetimet zbuluan gjithashtu se 22-vjeçari qëndronte në mënyrë të paligjshme në territorin italian. Ai tashmë përballet me akuza për trafik droge dhe qëndrim ilegal në Itali.

Zvicra, partnere e qëndrueshme në menaxhimin e ujërave në Kosovë

Posted on by Drin Reçica

Zvicra mbetet një partner i hershëm dhe i përkushtuar në promovimin e menaxhimit të qëndrueshëm të burimeve ujore në Kosovë. Në bashkëpunim të ngushtë me partnerët tanë, patëm kënaqësinë të merrnim pjesë në ceremoninë zyrtare të nënshkrimit për Skemën e Granteve të Organizatave të Shoqërisë Civile (OSHC), pjesë e IWRM-K.

Ky ngjarje e rëndësishme thekson angazhimin tonë të vazhdueshëm për forcimin e rolit të shoqërisë civile në mbrojtjen e burimeve ujore të Kosovës. Përmes kësaj skeme grantesh, OSHC-të e përzgjedhura do të zbatojnë iniciativa inovative, të drejtuara nga komuniteti, që synojnë të rrisin mbrojtjen e ujit, të rrisin ndërgjegjësimin publik dhe të promovojnë praktikat e përdorimit të qëndrueshëm të ujit.

Ne i përgëzojmë ngrohtësisht të gjitha organizatat e përzgjedhura dhe presim me padurim kontributet domethënëse që ato do të japin në dobi të komuniteteve dhe mjedisit.

Presidentja Osmani pret mërgatën në një pritje tradicionale në Presidencë

Posted on by Drin Reçica

Presidentja e Republikës së Kosovës, Vjosa Osmani-Sadriu, do të mirëpresë bashkatdhetarët në një pritje tradicionale të organizuar me rastin e ardhjes së mërgatës në vendlindje gjatë muajve të verës, shkruan albinfo.ch.

Ngjarja do të mbahet sot, të enjten, më 31 korrik 2025, duke filluar nga ora 19:00, në oborrin e Presidencës së Republikës së Kosovës.

Kjo pritje tashmë është bërë një traditë vjetore, ku Presidentja shpreh mirënjohjen dhe respektin ndaj mërgatës për rolin e tyre të rëndësishëm në zhvillimin ekonomik, shoqëror dhe diplomatik të vendit. Pritja synon të forcojë lidhjet ndërmjet institucioneve dhe bashkatdhetarëve që jetojnë e veprojnë jashtë vendit.

Rreziqet dhe problemet nga akulloret e skaduara

Posted on by Alb

Me ardhjen e ditëve të ngrohta, akulloret rikthehen si një zgjedhje e preferuar për shumë njerëz.

Megjithatë, është e rëndësishme të keni kujdes.

Rreziku më i madh që vjen nga konsumimi i akulloreve të vjetëruara apo të paketuar keq është helmimi ushqimor.

Data e skadencës nuk duhet të jetë kriteri i vetëm që përdorni për të vendosur nëse një akullore është e sigurt për t’u ngrënë.

Duhet të kontrolloni gjithashtu nëse paketa është hapur, fryrë ose nëse akullorja është ruajtur në kushte të përshtatshme.

Sipas AgroWeb akulloret e vjetëruara janë më të ndjeshme ndaj baktereve të dëmshme.

Bakteret kanë tendencë të zhvillohen në ushqime që përmbajnë proteina, si vezët, mishi, peshku dhe produktet e qumështit.

Edhe pse ngrirja e ngadalëson rritjen e tyre, ajo nuk i shkatërron plotësisht.

Nëse një akullore është lënë e hapur në frigorifer, ajo mund të kthehet në një ambient të përshtatshëm për zhvillimin e baktereve.

Kur nxirret nga frigoriferi, bakteret fillojnë të shumohen shpejt, duke rritur rrezikun e helmimit.

Këshillohet që të mos konsumoni akullore me paketim të dëmtuar, pasi kjo mund të jetë e rrezikshme.

Sigurohuni që akullorja të jetë plotësisht e ngrirë dhe jo e shkrirë pjesërisht, dhe që frigoriferi të jetë në temperaturë të ulët dhe të qëndrueshme.

Akulloret e paprekura dhe të ruajtura në minus 17 gradë Celsius mund të konsumohen me siguri brenda 2-3 muajsh.

Nëse dëshironi ta ruani më gjatë, është mirë ta mbështillni me karton ose qese plastike me vakum për të ruajtur cilësinë.

Si të dalloni një akullore jo cilësore

Një akullore e prishur mund të mos ketë shije të keqe menjëherë, por mund të ketë kristale akulli në sipërfaqe ose në pjesën e poshtme të paketës.

Akulloret janë burim i yndyrnave të shëndetshme, kalciumit, enzimave, vitaminave dhe mineraleve — por vetëm nëse bëhen me përbërës cilësorë, si qumësht, vezë dhe ëmbëlsues natyralë.

Akullorja më e mirë është ajo e bërë në shtëpi, ku receta është e thjeshtë dhe përfshin përbërës si qumësht, vezë, sheqer, vanilje dhe fruta ose arra sipas dëshirës.

Akt vandal në Prizren, dëmtohet shtatorja e Skënderbeut

Posted on by Alb

Pas përdhosjes së flamurit kombëtar në Suharekë, një tjetër akt vandal ka tronditur opinionin publik në Kosovë. Këtë herë, në shënjestër ka qenë shtatorja e heroit kombëtar Gjergj Kastrioti Skënderbeu në Prizren, e cila është dëmtuar nga persona të panjohur.

Sipas raportimeve, përkrenarja dhe shpata e shtatores janë lyer me ngjyrë ari, veprim ky që është cilësuar si një provokim i hapur dhe fyes ndaj simbolikës kombëtare.

Shoqata “Trojet e Arbrit” ka reaguar menjëherë, duke e quajtur këtë akt si një “sulm të qëllimshëm dhe të shëmtuar ndaj figurës më të ndritur të historisë shqiptare”. Kryetari i shoqatës, Nue Oroshi, përmes një reagimi në Facebook, i ka bërë thirrje institucioneve të sigurisë dhe drejtësisë që të veprojnë urgjentisht për të identifikuar dhe ndëshkuar autorët.

“Ky është një akt i papranueshëm, një provokim që prek jo vetëm figurën e Skënderbeut, por edhe dinjitetin dhe krenarinë tonë kombëtare,” deklaroi Oroshi.

Ndërkohë, Policia Rajonale e Prizrenit njoftoi se ka nisur verifikimet në terren dhe se po bashkëpunon me Prokurorinë për hapat e mëtejmë. Sipas autoriteteve, zona ku ndodhet shtatorja është nën mbikëqyrjen e kamerave të sigurisë, të cilat pritet të ndihmojnë në identifikimin e autorëve.

Shtatorja e Skënderbeut, e vendosur në rrethrrotullimin e rrugës “Hasan Prishtina” në Prizren më 28 nëntor 2020, është një prej monumenteve më të rëndësishme të qytetit dhe bart vlera të thella historike dhe patriotike për gjithë shqiptarët.

Gjykata Komerciale e Kosovës pezullon vendimin e ZRrE-së për tregun e lirë të energjisë

Posted on by Alb

Gjykata Komerciale e Kosovës ka vendosur pezullimin e vendimit të Zyrës së Rregullatorit për Energji (ZRrE), i cili parashihte kalimin e bizneseve në tregun e lirë të energjisë elektrike. Vendimi u bë i njohur nga avokatja Blinera Osmani, e cila njoftoi se më 29 korrik 2025, gjykata nxori aktgjykimin KA.nr.301/25, duke anuluar disa pika të vendimit të ZRrE-së dhe pezulluar zbatimin e tyre deri në një vendim përfundimtar.

Kjo do të thotë se bizneset që ishin në proces të daljes në tregun e lirë do të kthehen përsëri në tregun universal, ku furnizimi me energji bëhet me tarifa të rregulluara dhe të garantuara, siç ishte para 1 qershorit 2025.

Avokatja Osmani bëri thirrje që ZRrE dhe operatorët e tjerë të respektojnë menjëherë këtë vendim gjyqësor.

Eurodeputeti austriak Lukas Mandl viziton djemtë e heroit të Kosovës

Posted on by Alb

Eurodeputeti austriak, Lukas Mandl, ka takuar Adri dhe Nuri Bugarin, djemtë e heroit të Kosovës, Abdullah Bugari, në kompaninë e tyre në Austri.

Gjatë takimit, ata diskutuan për sfidat dhe mundësitë në biznes, duke përfshirë digjitalizimin, mungesën e fuqisë punëtore dhe rëndësinë e një Europe të bashkuar dhe të fuqishme.

Adri Bugari e përshkroi takimin si një dialog frymëzues me një politikan që dëgjon dhe mbështet bizneset si i tyre. Ai falënderoi Mandlin për mbështetjen e tij.

Deri në fund të vitit, gjysma e refugjatëve me statusin S duhet të jenë të punësuar

Posted on by Alb

Refugjatët nga Ukraina që gëzojnë statusin e mbrojtjes S në Zvicër do të duhet të përfshihen më shumë në tregun e punës. Deri në fund të vitit, synohet që çdo i dyti person me këtë status të jetë i punësuar. Megjithatë, kantonet janë në ritme të ndryshme  dhe rezultatet ndryshojnë ndjeshëm, transmeton albinfo.ch.

Çfarë është statusi S?

Ky status u aktivizua për herë të parë në mars të vitit 2022, si reagim ndaj luftës në Ukrainë. Ai u mundëson refugjatëve të punojnë menjëherë, të bashkojnë familjen, të udhëtojnë lirshëm dhe të fusin fëmijët në shkollë.

Faktorët që ndikojnë në integrimin në tregun e punës:

1. Situata ekonomike në kanton:

Kantonet me ekonomi të larmishme dhe me mundësi për punë të thjeshta kanë përparësi.

Shembull: Thurgau ka një rrjet të fortë ekonomik dhe është ndër më të mirët,  ka integruar tashmë 41% të personave të punësueshëm me status S.

2. Vendndodhja gjeografike:

Aargau, pavarësisht se ka numër të madh refugjatësh, ka një normë punësimi 43%, pjesërisht sepse shumë punëkërkues punësohen në kantone fqinj, si Zürich.

3. Organizimi i brendshëm i kantoneve:

Në kantonin Basel-Landschaft, integrimi është më i ngadalshëm (vetëm 31%) për shkak të strukturës së decentralizuar,  ku çdo komunë punon në mënyrë të pavarur. Kjo solli diferenca të mëdha nga një komunë në tjetrën.

Romandia mbetet prapa

Në Zvicrën frëngjishtfolëse, integrimi është më i ngadalshëm. Një nga arsyet është natyra shumë e specializuar e tregut të punës dhe konkurrenca me punëtorët ndërkufitarë.

E ardhmja e statusit S është e paqartë

Statusi S është i vlefshëm deri në vitin 2026, por pritet që Këshilli Federal ta zgjasë. Megjithatë, nuk është e qartë se çfarë do të ndodhë me refugjatët nëse ky status hiqet.

Punonjësit e turizmit shprehin pakënaqësi për sezonin aktual

Posted on by Alb

Çarshia e Ohrit këto ditë shfaqet me mbeturina kudo, përveç në bregun e liqenit. Të rinjtë nga e gjithë Maqedonia që kanë ardhur për koncertet e shumta në qytet, nuk tregojnë kujdes të mjaftueshëm ndaj pastërtisë, duke lënë pas mbetje ushqimesh dhe pije deri në orët e para të mëngjesit. Fundjava tjetër pritet të jetë kulminacioni i sezonit, për shkak të koncerteve të disa prej yjeve më të njohur muzikorë botërorë dhe ballkanikë, që do të sjellin një valë vizitorësh, raporton alsat transmeton albinfo.ch

Megjithatë, punonjësit në sektorin e turizmit shprehen të zhgënjyer, duke theksuar se sezoni është më i dobët krahasuar me vitet e kaluara, sidomos në muajt qershor dhe korrik.

“Së fundmi, frekuentimi i plazheve ka rënë ndjeshëm dhe tani Ohri po bëhet kryesisht një destinacion fundjavash. Gjatë fundjavave, kur organizohen evente, numri i vizitorëve arrin në 200-300, por në ditët e javës ai bie në vetëm 20-30 persona. Nuk dua të bëj vetëm krahasime me sezonin e kaluar, pasi që pas pandemisë në vitin 2021, kemi parë një ndryshim të rëndësishëm në modelin e vizitorëve,” tha Lubisha Arsiq, nga Ohri.

Situata aktuale lidhet kryesisht me fuqinë e ulët blerëse të turistëve dhe fushatat negative ndaj Ohrit. Edhe pronarët e anijeve turistike raportojnë për ulje të konsiderueshme të punës gjatë këtij viti.

“Jemi të pakënaqur, sepse numri i turistëve ka rënë që nga sezoni i kaluar për shkak të rritjes së çmimeve. Kemi pritur mbi 500,000 vizitorë, por çmimet e larta kanë frenuar turistët vendas dhe të huaj. Shumica e mysafirëve vijnë nga Serbia, Kroacia dhe vendet fqinje, por shumë prenotime janë anuluar kohët e fundit. Megjithatë, mbajmë shpresë për një sezon më të mirë,” tha Ahmed Bajraktar, varkëtar.

“Ky sezon është dukshëm më i dobët se ai i vitit të kaluar. Shpresojmë që numri i turistëve të rritet në javët në vijim. Disa ankesa lidhen edhe me çmimet, por presim që situata të përmirësohet shpejt,” shtoi Tashe Ristanoski, gjithashtu varkëtar.

Këtë verë ka pasur më shumë mysafirë nga Polonia, Holanda, Turqia, Anglia dhe Gjermania, ndërsa turmat në qytet përbëhen kryesisht nga qytetarët me apartamente në Ohër, numri i të cilëve kap shifrën mbi 20,000.