Ish-kryeministri dhe diplomati i njohur suedez, Carl Bildt, ka komentuar krizën politike në Kosovë, përcjell albinfo.ch.

Përmes një postimi në rrjetin social X, Bildt ka ngritur pyetjen nëse Kosova do të arrijë ndonjëherë të krijojë një qeveri funksionale.

“A do të ketë Kosova ndonjëherë një qeveri të re? Pamundësia për të ecur përpara po dëmton besueshmërinë e vendit, dhe kjo është keq për të gjithë”, ka shkruar Bildt.

Deputetët e Kuvendit të Kosovës nuk arritur  dje as për të 50-ën herë ta konstituojnë Kuvendin e Kosovës.

Kosova nuk ka Kuvend të konstituuar as pesë muaj pas mbajtjes së zgjedhjeve të rregullta parlamentare të 9 shkurtit. Palët vazhdojnë të mos gjejnë një kompromis ndonëse afati i përcaktuar nga Gjykata Kushtetuese për konstitutim të Kuvendit është drejt fundit.

https://x.com/carlbildt/status/1947564445883842564?ref_src=twsrc%5Etfw%7Ctwcamp%5Etweetembed%7Ctwterm%5E1947564445883842564%7Ctwgr%5E9f7cd521abc10951398c4b45852447f0c507f7a5%7Ctwcon%5Es1_&ref_url=https%3A%2F%2Freporteri.net%2Flajme%2Fdiplomati-suedez-kriza-politike-po-e-demton-kosoven-kjo-eshte-e-keqe-per-te-gjithe%2F

Presidentja e Kosovës, Vjosa Osmani, ka paralajmëruar mbajtjen e një konference për media pasditen e sotme, përcjell albinfo.ch.

Siç njofton Zyra për Informim e Presidencës, konferenca do të mbahet në orën 16:00 në Kabinetin e Presidentes.

Tema e kësaj konference nuk është bërë e ditur.

Rohde teston pajisjet ushtarake në Kampin Bondsteel, të njëjtat përdoren në patrullimet kufitare Kosovë-Serbi, përcjell albinfo.ch.

Ambasadori gjerman në Kosovë, Jorn Rohde bashkë me zëvendësin e tij, Christian Böttcher kanë vizituar trupat gjermane të KFOR-it në Kampin Bondsteel, ku morën një informim të detajuar mbi misionet aktuale, aftësitë operacionale dhe pajisjet teknike që përdoren gjatë patrullimeve dhe vëzhgimeve të kufirit ndërmjet Kosovës dhe Serbisë.

“Një vizitë e mbushur me kujtime dhe përshtypje të thella: Së bashku me zëvendësin tim, eksploruam pajisjet teknike dhe fuqinë operacionale të trupave tona të KFOR-it në Kampin Bondsteel. Ende krenar që shoh Ahlmannin në veprim – tani pak më modern sesa në ditët e mia në Marinë. Faleminderit ekipit për punën e tyre të shkëlqyer”, ka shkruar Rohde në BlueSky.

“U ndjeva si në shtëpi,” tha ambasadori Rohde, duke kujtuar përvojën e tij të shërbimit në Strandmeisterkompanie në Gjermani nw vitet e ’80-ta.

Një moment emocional për ambasadorin ishte rikthimi pas dekadash në drejtimin e një makinerie të njohur për të – ngarkuesi Ahlmann, tashmë i modernizuar.

“Nga automjetet moderne të blinduara te sistemet e avancuara të vëzhgimit, ambasadori u impresionua nga preciziteti, profesionalizmi dhe përkushtimi i trupave në zbatimin e mandatit të KFOR-it,” thuhet në njoftimin e Ambasadës Gjermane.

Në fund të vizitës, ambasadori shprehu falënderim të veçantë për punën e ushtarëve gjermanë në Kosovë.

“Puna juaj është thelbësore, ekspertiza juaj mbresëlënëse dhe përkushtimi juaj thellësisht i vlerësuar”, ka theksuar ambasadori Rohde.

Vizita theksoi edhe një herë përkushtimin e Gjermanisë për paqen dhe sigurinë në Kosovë, si dhe rëndësinë e bashkëpunimit të vazhdueshëm përmes NATO-s dhe misionit të KFOR-it.

Koha mesatare e reagimit policor sipas Inspektoratit Policor të Kosovë (IPK) është 13.7 minuta, përcjell albinfo.ch.

Referuar raportit të inspektimit “Reagimi në thirrjet e qytetarëve dhe raportimi i aktiviteteve policore”, të realizuar nga IPK-ja treguesit statistikor mbi kohën e reagimit në pamje të përgjithshme nuk pasqyrojnë ndryshim krahasuar me matjet e bëra nga IPK-ja para tri vjetëve, me disa ndryshime te një numër stacionesh dhe drejtorive rajonale.

“Koha mesatare e reagimit policor për këtë vit në nivel vendi që është 13.7 minuta, ka rezultuar e njëjtë si në matjet nga viti 2022”, thuhet në njoftimin e IPK-së.

Raporti thuhet se vë në pah se nga këndvështrimi i nivelit të drejtorive rajonale, Drejtoritë Rajonale Ferizaj, Mitrovicë Veri dhe Mitrovicë e Jugut kanë reagim më të shpejtë krahasuar me drejtoritë tjera policore.

Gjetjet e këtij inspektimi thuhet se janë me interes për nivelet drejtuese dhe operative të strukturave policore të Departamentit të Rendit Publik, duke përfshirë edhe stacionet policore.

“IPK në kuadër të Raportit ka dhënë katër (4) rekomandime, që kanë të bëjnë me nevojën e shtimit të kontrolleve në zyrat e radio komunikimit tek një numër stacionesh në drejtim të përmirësimit të cilësisë së Logut operacional, organizimin e trajnimeve për mbajtjen cilësore të Logut operacional apo nxjerrjen e një manuali operativ mbi procedurën dhe veprimet në menaxhimin e thirrjeve, analizimin e kohës së reagimit për të identifikuar shkaktarët që ndikojnë në zgjatjen e saj, etj”, thuhet në njoftim.

Kryeministri në detyrë, Albin Kurti tha se mendimi i Gjykatës Ndërkombëtare të Drejtësisë për pavarësinë e Kosovës 15 vjet më parë ishte “një nga momentet më frymëzuese në marrëdhëniet ndërkombëtare”, përcjell albinfo.ch.

Ai kujtoi këtë akt si vulë të “ligjshmerisë së pavarësisë së Kosovës në të drejtën ndërkombëtare”.

“Sot bëhen 15 vite nga shpallja e Mendimit Këshilldhënës të Gjykatës Ndërkombëtare të Drejtësisë për Deklaratën e Pavarësisë së Kosovës. Mendimi Këshilldhënës i GjND-së i dha dritë njohjes vendimtare të së drejtës së popullit të Kosovës për shtetformim, vetëvendosje e liri. Ajo do mbetet akt i vulosjes së ligjshmerisë së pavarësisë së Kosovës në të drejtën ndërkombëtare, dëshmi për legjitimitetin ndërkombëtar të së drejtës për vetëvendosje të popullit të Kosovës dhe akt konfirmues i evidencës shoviniste e kolonizuese të Serbisë ndaj popullit shqiptar të Kosovës”, shkroi Kurti në një postim në Facebook.

“Mendimi Këshilldhënës është një nga momentet më frymëzuese në marrëdhëniet ndërkombëtare, për shkak se i jep shpresë e vullnet popujve liridashës që drejtësia ndaj kauzës së tyre më në fund edhe mund të triumfojë”, shtoi ai.

Kurti tha se “nuk do mend” se “vlera juridike e këtij Mendimi do t’i shërbejë gjeneratave të juristëve si një mësim për parimësinë dhe etikën në vendosjen e interpretimin e vlerave universale”.

“Ajo do mbetet edhe një mësim për Serbinë, e cila me nxitim loboi në Asamblenë e Përgjithshme të OKB-së për ta pyetur Gjykatën për ligjshmërinë e pavarësisë së Republikës sonë. Nxitimi i saj u kthye në një humbje të madhe të politikës serbomadhe, e po ashtu simbolikisht një kujtim për viktimat e kolonizimit, diskriminimit sistematik e gjenocidit të saj”, shkroi ai.

Dëshmitari Rade Nedelkoviq- i cili ishte roje në hotelin “Rajnska Banjska”, gjatë dëshmisë së tij të martën në Gjykatën Themelore në Prishtinë në gjykimin ndaj tre akuzuarve lidhur me sulmin terrorist të 24 shtatorit 2023 në fshatin Banjskë të Zveçanit: Vladimir Toliq, Dushan Maksimoviq dhe Blagoje Spasojeviq, tregoi se si katër persona e kishin sjellë ditën kritike një të plagosur në hotel, përcjell albinfo.ch.

Prokurori special Naim Abazi fillimisht theksoi se dëshmitari Nedelkoviq në Prokurori kishte deklaruar se në ditën kritike kur ka ndodhur sulmi në Banjskë, kishte dalë 50 herë nga hoteli për të parë se çfarë po ndodhte, raporton “Betimi për Drejtësi“.

Nedelkoviq tha se aty nuk kishte parë veturë, por disa persona të uniformuar, tha se i kishte paralajmëruar të largohen nga tarraca e hotelit ngase dikush mund t’i vriste dhe më pas ishin larguar.

I pyetur lidhur me deklaratën e tij se në ditën kritike rreth orës 16:30 në hotel ‘Rajnska Bansjka’kanë hyrë persona të armatosur që e bartnin një person të plagosur dhe se a kishin ndonjë emblemë apo shenjë që tregon se cilit grup i takonin, dëshmitari tha se s’kishin pasur diçka të tillë.

Lidhur me personin e plagosur, ai tha se kishte mbetur të flinte në një dhomë, ndërkaq dëshmitari të nesërmen kishte shkuar në shtëpi, andaj nuk e di se çfarë ka ndodhur.

Ai deklaroi se pasi kishin lënë të plagosurin, disa persona ishin nisur në drejtim të Manastirit në këmbë.

Lidhur me deklaratën e tij se përpara se të pranonte personin e plagosur në hotel i kishte telefonuar shefi i tij Ivan Filiminoviq dhe i kishte thënë ta strehonin atë person aty, Nedelkoviq tha se Filiminoviq nuk e ka urdhëruar, por vetëm i kishte thënë që t’ia jepte dhomën numë 6.

“Nuk më ka thënë kush ka qenë në Kragujevc, këtë e kam kuptu pas disa dite”, tha ai.

Dëshmitari shtoi se kishte folur edhe me një koleg të tij i cili ishte polic hetues në Mitrovicë, ndërkaq shtoi se lista e mysafirëve ka qenë në recepsion, e cila sipas tij mbetet tek evidenca e klientëve sa ditë qëndrojnë aty.

Duke u ballafaquar me deklaratën e dhënë në Prokurori, Nedelkoviq tha se nuk e njeh personin me emrin Sliviq dhe se nuk e di nëse djali i tij ka marrë pjesë në sulm, por meqenëse ka qenë atje beson se po.

Personat që e sollën të plagosurin në hotel, ai tha se kishin hyrë tek hyrja e dytë dhe jo tek ajo kryesore.

“Unë kam qenë i detyruar t’i lëshoj se kanë qenë të armatosur, nuk kam guxuar të refuzoj. Pra, dy kanë mbetur e dy janë larguar, domethënë i plagosuri dhe një tjetër kanë mbetur”, shtoi dëshmitari.

Ndërkaq, i pyetur lidhur me personat që kanë qenë të përfshirë në sulm, ai tha se nuk e di se kush ka qenë ngase kanë pasur maska.

Prokurori e pyeti se a kanë qenë Vladimir Andriq dhe Vladan Iliq, dëshmitari Nedelkoviq tha se nuk i kujtohet se i ka përmendur dhe as nuk i ka parë ata.

Kurse, për Milan Radoiçiqin, ai tha “vetëm kam dëgjuar, kurë nuk e kam pa. Ka qenë një herë në hotel sepse edhe nëse vinte, vinte pak si më ndryshe”.

“A mendoni se ka qenë organizator i këtij grupi”, e pyeti prokurori Abazi.

“Çfarëdo që mendoj unë, ai vetë e ka pranuar”, u përgjigj Nedelkoviq, duke shtuar se e dini se kush janë personat që i kanë ndihmuar Radoiçiqit.

Nedelkoviq tha se si roje i objektit mund të pranojnë mysafirë, por nuk kanë të drejtë të shkruajnë evidencën, për këtë tha se e ka thirrë recepsionisten, andaj nuk e di se çfarë ka bërë ajo.

Në ditën kritike të 24 shtatorit 2023, dëshmitari tha se kishte filluar punën në orën 21:30 dhe se kishte qëndruar dy ditë. Tha se ka punuar si roje në hotel ‘Rajnska Banjska’.

Lidhur me rastin, ai shtoi se ishte dëgjuar një zhurmë e madhe dhe të gjithë klientët që ishin në hotel kishin zbritur poshtë, e që ai është dashur të kujdeset për të gjithë.

“Janë sjellë rreth xhamave dhe unë ju kam thënë largohuni se dikush mund të ju gjuaj, janë largu më larg dhe kanë dëgju atë”, tha Nedelkoviq.

Ai tha se drejtuesi i hotelit Marko Saviq atë natë nuk ka qenë në hotel. Tha se rreth orës 16:30 kishin shkuar katër persona të armatosur jashtë hotelit dhe se ai i kishte larguar e që nuk kishin hyrë në hotel.

Sipas tij, të lartpërmendurit nuk ishin ata që e kishin dërguar personin e plagosur në hotel. Më pas, tha se personi i plagosur ishte sjellë në orën 4:30 në mëngjes dhe se personat që e sollën të plagosurin nuk i ka njohur dhe që ata kishin maska.

Dëshmitari u pyet lidhur me deklaratën që ka dhënë në Prokurori se njëri prej personave që e sollën të plagosurin ishte djali i një futbollisti me emrin Sliviq.

“Nuk e di saktë a kam dëgjuar, por më kanë kërkuar t’i evidentoj që të mos jap përgjegjësi për ta por të japin përgjegjësi për vete, ka qenë korrekte nga ana e tyre”, tha Nedelkoviq.

Për personin me emrin Sliviq, ai tha se ka mundësi ta ketë përmendur, por që edhe ka mundësi të mos ketë dëgjuar mirë.

Për shefin Ivan Filianoviq dhe kërkesën e tij që i plagosuri të akomodohej në dhomën numër 6, ai tha se e dinte që dhoma është e lirë ngase ka qenë vazhdimisht në kontakt me recepsionisten. Kurse, personi tjetër tha se ishte vendosur në dhomën 3.

Drejtorin Marko Saviq ai tha se e kishte thirr me kërkesë të një hetuesi, por që nuk kishte biseduar me të.

Lidhur me deklaratën e dhënë në Prokurori, dëshmitari tha se nuk i është lexuar fjalë për fjalë në gjuhën serbe, por vetëm deri diku, e që beson se e ka kuptuar.

Nedelkoviq tha se sot është hera e katërt që po dëshmon për këtë rast. Tha se për Vlastimir Andriqin nuk e ka pyetur askush, por që e kishte fqinj.

Dëshmitari shtoi se Dushan Maksimoviqin e njeh që është nga Banjska dhe se sipas tij është djalë shumë i mirë.

“Ai ka punu në mirëmbajtje të ngrohjes dhe ftohjes, ka punuar gjithçka. Askund nuk e kam përmend (Dushanin), as nuk më kanë pyet as nuk kam pas nevojë ta përmend”, tha ai.

Nedelkoviq shtoi se para 24 shtatorit e ka parë çdo ditë ngase ai punonte në banjë e dëshmitari në hotel. Tha se Dushani kishte marrë pjesë edhe në ndërtimin e hotelit.

“Më 24 shtator, ai ka qenë në Suhadoll ku kanë bërë një vikendicë”, tha ai.

Më pas, dëshmitarit iu paraqitën disa foto. Tha se uniforma e Dushanit nuk i ka ngjarë asaj të hotelit, por ka qenë më ndryshe.

Prokurori Abazi më pas i tha se në fillim të seancës Nedelkoviq deklaroi se qëndron pranë deklaratës së dhënë në Prokurori, ku ka pasur edhe përkthyes dhe ka ka video-incizim. Tha se deklarata është nënshkruar në secilën faqe.

“T’ju them të drejtën as nuk e kam lexuar”, tha Nedelkoviq.

Meqenëse dëshmitari tha se villa ku ka qëndruar Dushan Maksimoviq ishte në Suhadoll dhe se e njëjta ishte e dhëndrit të tij, përmes fotografisë iu kërkua të identifikojë nëse bëhet fjalë për vilën e njëjtë.

“Këta janë komshinjtë e mi, i njoh. Vendi po, ky është kontejneri, fotografia e dytë është e saktë”, pohoi ai.

Polici dëshmon për natën kritikeu në Banjskë: Nuk kishim të bëjmë me një grup të thjesht kriminal

Është duke vazhduar seanca gjyqësore në rastin “Banjska”.  Para gjykatës janë sjellë të akuzuarit Blagoje Spasojeviq, Vladimir Toliq dhe Dushan Maksimoviq.

I pari që ka nis dëshminë e tij, është dëshmitari Halim Behramaj.

Ai ka thënë se punon si polic hetues në njësinë e trafikut në Mitrovicë.

“Rreth orës 2 përmes radiolidhjes një njësi kufitare ka njoftuar se në Banjskë është vendosur një barrikadë. Dy njësi kanë vazhduar menjëherë në atë drejtim, pas 2 minutave unë me kolegun Avni Shala, kemi vazhduar prapa tyre, nëse kanë nevojë për asistim. 500-600 metra pa shku në fshatin Banjskë, jemi taku me ta dhe vazhduam në drejtim të Banjskës. Kanë qenë tri vetura policore… pasi kemi arritur në fshatin Banjskë, ne kemi qenë 30 metra larg barrikadës(vetura jonë e treta). Jemi dalë prej veturës, policët që kanë qenë në veturën e parë kanë arritur te barrikada. Në atë moment polici Elez Peci na ka tërheq vërejtjen se mund të jetë kurth dhe kemi fillu të shpërndahemi”, ka thënë ai.

Ka shtuar se në vendin ku ka qenë barrikada ka pasur ndriçim të plotë, ndërsa në fshat errësirë totale.

“Posa kemi filluar të shpërndahemi e kemi degju një shpërthim të madh. Policët që kanë qenë më afër barrikadës, janë barikadu afër aty. Ndërsa unë dhe Avni Shala jemi barikadu prapa veturës tonë. Të njëjtën kohë, ka pasë edhe të shtëna me armë të ndryshme. E kemi kuptuar që nuk kemi të bëjmë me një grup të thjesht kriminal. Nga pozita dhe armët na ka lënë me kuptu që janë një grup i organizuar. E kam vërejt që rreshteri Afrim Bunjaku është i shtrirë në rrugë, na kemi qene 30 metra larg dhe ishte e pamundur të afrohemi. Avni Shala e ka kthy zjarrin, pasi e kishte një armë automatike”, ka thënë ai.

Ai ka shtuar se nga fshati Izvor ka shkaur edhe një autoblinde e njësisë së reagimit të shpejt.

Ka deklaruar se ka pasur gjuajtje me armë të rënda.

Sipas tij, pozita ku kanë qenë të vendosur, i ka bërë të kuptojnë që është grup shumë i organizuar.

Ministria e Shëndetësisë në bazë të rekomandimeve të IKSHPK-së rekomandon që institucionet publike dhe private të zbatojnë masa mbrojtëse për mbrojtjen e punëtorëve nga temperaturat e larta, për periudhën 22 – 25 korrik 2025, përcjell albinfo.ch.

Përmes një njoftimi nga Ministria e Shëndetësisë, ftohen të gjitha institucionet që t’i respektojnë këto rekomandime, me qëllim të mbrojtjes së shëndetit të punëtorëve dhe të grupeve të tjera të ndjeshme.

“Temperaturat e larta ndikojnë negativisht në shëndetin e njeriut, veçanërisht tek grupet më të ndjeshme të shoqërisë, si: fëmijët, të moshuarit, gratë shtatzëna, personat me sëmundje kronike, si dhe punëtorët që punojnë në ambiente të hapura apo në kushte pune me temperatura të larta. Ftohen të gjitha institucionet që t’i respektojnë këto rekomandime, me qëllim të mbrojtjes së shëndetit të punëtorëve dhe të grupeve të tjera të ndjeshme”, thuhet në njoftim.

Kosova është duke u përballur me temperatura të larta që pritet të arrijnë deri 38 gradë Celsius, përcjell albinfo.ch.

Instituti Hidrometeorologjik i Kosovës ka thënë se Kosova është në kushte të motit jashtëzakonisht të rrezikshëm, veçanërisht nëse zgjatë disa ditë rresht.

IHMK-ja ka thënë se nga kjo valë e të nxehtit janë të rrezikuar veçanërisht të sëmurët kronikë, personat në terapi mjekësore dhe kontroll mjekësor.

Në Gjykatën Themelore në Prishtinë, edhe të martën po vazhdon gjykimi ndaj të tre akuzuarve lidhur me sulmin terrorist të 24 shtatorit 2023 në fshatin Banjskë të Zveçanit: Vladimir Toliq, Dushan Maksimoviq dhe Blagoje Spasojeviq, përcjell albinfo.ch.

Në këtë seancë pritet të dëgjohen dëshmitarët Halim Behramaj dhe Rade Nedelkoviq.

Seanca e 18 korrikut 2025 dështoi në mungesë të dëshmitarit anonim A2. Kurse, ajo e 21 korrikut u mbyll me kërkesë të prokurorit special Naim Abazi, për shkak se do të dëgjohej dëshmitari anonim F1, në mënyrë që të mbrohej identiteti i dëshmitarit dhe procedurës penale.

Gjykata Themelore në Prishtinë pas propozimit të prokurorit special Naim Abazi që gjykimi të vazhhdojë në mungesë, i ishte drejtuar Gjykatës Supreme për të kërkuar opinion nëse në rastin “Banjska” mund të aplikohet gjykimi në mungesë. Por, Supremja, pas shqyrtimit të kërkesës “për dhënie të mendimit juridik përkitazi me nenin 303 par.7 të Kodit Procedurës Penale në rastin “Banjska”, kishte sqaruar se nuk jep mendime juridike për dilemat që ka shkalla e parë gjatë procedimit të rastit.

Kështu, Gjykata Themelore në Prishtinë ka marrë vendim, me të cilin ka refuzuar propozimin që gjykimi për 42 të akuzuarit tjerë (41 persona fizikë dhe një person juridik) të akuzuar për sulmin terrorist në “Banjskë” të vazhdojë në mungesë. Gjykata po ashtu kishte bërë të ditur që për këta të pandehur është lëshuar letërreshtim ndërkombëtar dhe pritet ndalimi dhe ekstradimi i tyre për zhvillimin e procedurës ndaj tyre.

Seanca e shqyrtimit gjyqësor ndaj të tre akuzuarve në rastin “Banjska”: Vladimir Toliq, Dushan Maksimoviq dhe Blagoje Spasojeviq, u mbajt më 17 prill 2025, në të cilën tre të akuzuarit u deklaruan të pafajshëm. Ndërsa, prokurori special Naim Abazi, mbrojtja e të akuzuarve dhe pala e dëmtuar, kanë dhënë fjalën hyrëse.

Edhe në shqyrtimin fillestar të mbajtur më 9 tetor 2024, tre të pandehurit janë deklaruar të pafajshëm.

Ndryshe, Gjykata Themelore në Prishtinë – Departamenti Special, me aktvendimin e 6 dhjetorit 2024, i kishte refuzuar si të pabazuara kërkesat për hudhje të aktakuzës dhe kundërshtimet ndaj provave, të paraqitura nga mbrojtësit e të akuzuarve të lartpëmendur kundër aktakuzës së Prokurorisë Speciale të Republikës së Kosovës.

Kurse, Gjykata e Apelit më 13 mars 2025 njoftoi se ka marrë vendim, me të cilin e ka vërtetuar aktvendimin e Gjykatës Themelore në Prishtinë me të cilën u konfirmua aktakuza ndaj të akuzuarve në rastin “Bajska”.

Deri tani, të arrestuar dhe nën masën e paraburgimit për këtë rast janë: Blagoje Spasojeviq, Vladimir Toliq dhe Dushan Maksimoviq, për të cilët është veçuar procedura penale.

Aktakuza e Prokurorisë Speciale ngarkon 44 persona fizikë dhe një person juridik “RAD D.O.O”. Listës së të akuzuarve i prin Milan Radoiçiq.

Prokuroria Speciale e Republikës së Kosovës (PSRK) më 11 shtator 2024 ka ngritur aktakuzë kundër Milan Radoiçiqit dhe 44 të tjerëve për sulmin terrorist të 24 shtatorit 2023 në Banjskë të Zveçanit. Të akuzuarit ngarkohen se përmes përdorimit të dhunës me armatim të rëndë, tentuan ta shkëpusin pjesën veriore të territorit të Republikës së Kosovës e t’ia bashkojnë Republikës së Serbisë, me ç’rast si rezultat i dhunës së përdorur ka mbetur i vdekur zyrtari policor Afrim Bunjaku e u rrezikua jeta e zyrtarëve tjerë policorë dhe popullatës civile.

Në Bajsnkë të Zveçanit, në orët e hershme të 24 shtatorit 2023, ishte vrarë rreshteri Afrim Bunjaku si dhe ishin plagosur dy të tjerë. Pastaj, të vrarë kishin mbetur edhe tre sulmues, kurse të tjerët ishin larguar pasi ishin strehuar për disa orë në Manastirin e Bajnskës. Milan Radoiçiq e kishte marrë përsipër përgjegjësinë për sulmin terrorist. /BetimipërDrejtësi