Rita Ora ka qenë së fundmi e ftuar në një intervistë të veçantë për televizionin prestigjioz ABC, ku foli me krenari për prejardhjen e saj dhe për rrugëtimin që e ka bërë një ikonë globale të muzikës pop.

E pyetur nga gazetari për ndikimin e rrënjëve të saj nga Kosova dhe Londra në artin që krijon sot, Rita nuk hezitoi të theksojë se origjina e saj është thelbësore në formimin e saj si artiste dhe si njeri.

“Mund të flas për këtë përgjithmonë. Kurrë nuk e harroj nga vij. Qysh në fillimet e mia, më shumë se një dekadë më parë, kam folur gjithmonë hapur për prejardhjen time si emigrante, për familjen time si refugjatë dhe sa shumë do të thotë kjo për mua. Më është dhënë mundësia të arrij ëndrrat e mia dhe kjo është diçka që nuk e marr kurrë si të mirëqenë”, tha interpretuesja e hitit “Let You Love Me”.

Rita theksoi se ndihet e obliguar të jetë zë i brezit të ri. “Jam avokate e madhe për t’i ndihmuar gjeneratat e ardhshme të qëndrojnë optimiste për të ardhmen e tyre me mjetet e duhura. Për ta bërë këtë, na duhen figura si unë dhe të tjerë që të flasim hapur. Arti im gjithmonë është mbështetur në integritetin personal, jo në atë që është ‘cool’ për momentin.”

Ajo foli edhe për rolin e rrjeteve sociale në jetën e saj, duke pranuar se i pëlqen TikTok-u dhe rrjetet sociale, por në procesin krijues mbetet besnike ndaj vetvetes. “Kur bëj muzikë, për mua është thelbësore të jem reale dhe e vërtetë me veten.”

Në intervistë, këngëtarja foli gjithashtu për momentin kur i propozoi martesë bashkëshortit të saj, regjisorit të njohur Taika Waititi, një hap që pati jehonë të madhe në mediat botërore.

“E di, mori shumë vëmendje mediatike. Madje edhe tani po flitet për të,” tha ajo duke qeshur. “Për mua ishte diçka shumë normale. Ishte një mënyrë për të marrë kontrollin dhe për t’i qëndruar fuqisë sime si grua. As që mendova ndryshe. Doja thjesht ta ‘bllokoja’,” tha 34-vjeçarja.

Rita tregoi se ndonëse ndiente emocione kur e bëri hapin, ajo nuk e pa si gjë të jashtëzakonshme. “Ishte momenti im me mikun tim më të mirë. Ende është. Dhe nuk e mendova shumë derisa njerëzit filluan të më thoshin: ‘Wow!’ Por unë mendoj se kjo duhet të normalizohet. Jemi po aq të fuqishme sa burrat që propozojnë tradicionalisht.”

Artistja e hiteve botërore përndryshe po vazhdon të shijojë suksesin e këngës së saj më të re “Heat”, e cila është mjaft verore dhe është pritur mirë nga audienca e saj.

Raportohet se dy shtetas të Turqisë, një mashkull dhe një femër, janë arrestuar mëngjesin e djeshëm, pasi tentuan të udhëtojnë me pasaportë të falsifikuar.

Rasti ka ndodhur në aeroportin “Adem Jashari”.

Referuar njoftimit të policisë, i dyshuari mashkull, gjatë kontrollit, ka prezantuar pasaportë me emrin e një personi tjetër.

Ndërkaq, e dyshuara femër, ka prezantuar pasaportë franceze, që po ashtu ishte në emër të dikujt tjetër.

Policia bën të ditur se të dyshuarit janë dërguar në mbajtje.

Rasti është iniciuar si “Falsifikim i dokumentit”.

Mësohet se komandanti i Policisë në Stacionin Policor në Lipjan, Argjend Gashi, ka dhënë dorëheqje nga pozita e tij, pas vdekjes së 27-vjeçarit, Agon Zejnullahu, në Lipjan, përcjell albinfo.ch.

27-vjeçari, vdiq të hënën pak pasi u vu nën pranga nga zyrtarët policorë.

Pesë zyrtarëve policorë të cilët ishin të përfshirë në rast, u është caktuar nga një muaj paraburgim për veprën “vrasje nga pakujdesia”, shkruan koha.net.

Bëhet e ditur se zyrtari i lartë i Departamentit Amerikan të Shtetit për Çështje Evropiane, Brendan Hanrahan, do të nisë një vizitë në Kosovë dhe dy vende të tjera të Ballkanit, Serbi dhe Bosnje e Hercegovinë, përcjell albinfo.ch.

“Pres me padurim përforcimin e lidhjeve mes Shteteve të Bashkuara dhe shteteve në rajon”, ka thënë ai përmes një postimi në platformën X.

Hollësi të tjera për vizitën nuk janë bërë të ditura.

Hanrahan është takuar një ditë më parë me presidenten e Kosovës, Vjosa Osmani, në zyrën e Departamentit të Shtetit në Uashington.

Përmes një postimi në Facebook, ajo ka thënë se bashkë me diplomatin amerikan kanë diskutuar për thellimin e partneritetit strategjik midis Kosovës dhe Shteteve të Bashkuara.

“Kosova është e gatshme ta avancojë bashkëpunimin me SHBA-të në fusha kyçe si mbrojtja, ekonomia dhe investimet strategjike me interes të ndërsjellë”, është thënë në postimin e Osmanit.

Sa i përket vizitës në Bosnje e Hercegovinë, Hanrahan e ka përmendur Dejtonin, marrëveshjen që i ka dhënë fund luftës në Bosnje më 1995, dhe rëndësinë e përvjetorit, që duket se është një referencë për Srebrenicën.

Më 11 korrik të vitit 1995 janë vrarë më shumë se 8.300 boshnjakë nga ushtria e Republikës Sërpska, entitetit serb të Bosnjës.

Masakra e Srebrenicës është cilësuar si më e rënda në Evropë që prej Luftës së Dytë Botërore dhe njihet si gjenocid.

Në maj të vitit të kaluar, Kombet e Bashkuara kanë miratuar një rezolutë që njeh 11 korrikun si Ditën Ndërkombëtare të Përkujtimit të Gjenocidit në Srebrenicë.

Deri tani, mbi 6.650 viktima të gjenocidit janë varrosur në Qendrën Përkujtimore Potoçari.

Më shumë se 1.000 persona të zhdukur janë ende në kërkim.

Gjykata të ndryshme kanë dënuar deri tani më shumë se 50 persona me gjithsej mbi 700 vjet burg për gjenocid dhe krime të tjera në Srebrenicë.

Ish-udhëheqësi i serbëve të Bosnjës, Radovan Karaxhiq, është dënuar me burgim të përjetshëm, ashtu si edhe ish-udhëheqësi ushtarak në Bosnje, Ratko Mlladiq.

Institucionet e Republikës së Kosovës nuk do të heshtin përballë shkeljeve sistematike të të drejtave të shqiptarëve në Luginën e Preshevës nga regjimi serb. Ky është mesazhi i qartë që përcolli ambasadori i Kosovës në Gjermani, Faruk Ajeti, në lidhje me vizitën e një delegacioni nga Lugina e Preshevës në Berlin, përcjell albinfo.ch.

“Zëri i tyre është zëri ynë dhe zëri ynë do të jetë gjithmonë e përherë zëri i tyre,” u shpreh ambasadori Ajeti, duke theksuar angazhimin e palëkundur të institucioneve të Kosovës për të mbrojtur të drejtat e shqiptarëve përtej kufijve shtetërorë.

Për të fuqizuar këtë zë pranë institucioneve dhe deputetëve gjermanë, një delegacion i përbërë nga figura kyçe të Luginës së Preshevës zhvilloi një vizitë të dytë zyrtare në Berlin. Delegacioni përfshinte Shaip Kamberin, deputetin e vetëm shqiptar në Parlamentin e Serbisë, Enkel Rexhepin, Kryetar i Këshillit Kombëtar Shqiptar në Serbi, Flora Ferati-Sachsenmaier, eksperte e të drejtave të njeriut, dhe Drita AG Zumberin, aktiviste e angazhuar në mbrojtjen e të drejtave të komunitetit shqiptar në Luginë.

Postimi i plotë:

Institucionet e Republikës së Kosovës nuk do të heshtin përballë shkeljeve sistematike të të drejtave të shqiptarëve në Luginën e Preshevës nga regjimi serb.

Zëri i tyre është zëri ynë dhe zëri ynë do të jetë gjithmonë e përherë zëri i tyre.

Për të fuqizuar edhe më tej këtë zë pranë institucioneve dhe deputetëve gjermanë, një delegacion i përbërë nga Shaip Kamberi, deputeti i vetëm shqiptar në Parlamentin e Serbisë, Enkel Rexhepi, Kryetar i Këshillit Kombëtar Shqiptar në Serbi, Flora Ferati-Sachsenmaier, studiuese dhe eksperte e çështjes së të drejtave të njeriut, dhe Drita AG Zumberi, aktiviste nga Lugina e Preshevës, zhvilluan vizitën e dytë në Berlin.

Gjatë kësaj vizite ata zhvilluan një sërë takimesh të rëndësishme me qëllim sensibilizimin dhe ndërgjegjësimin e miqve gjermanë mbi diskriminimin sistematik ndaj shqiptarëve në Luginën e Preshevës. Ata theksuan nevojën urgjente për përforcimin e pozitës së shqiptarëve në këtë rajon, si dhe për mbështetjen ndërkombëtare në adresimin e padrejtësive të vazhdueshme që ata po përjetojnë.

Këshilltari Federal Martin Pfister u takua me Ministrin e Mbrojtjes së Kosovës, Ejup Maqedonci, përcjell albinfo.ch.

Gjatë vizitës së tij zyrtare në Kosovë, Këshilltari Federal Zviceran Martin Pfister, Kryetar i Departamentit Federal të Mbrojtjes, Mbrojtjes Civile dhe Sportit, u takua me Ministrin e Mbrojtjes së Kosovës, Ejup Maqedonci. Të dy ministrat shkëmbyen pikëpamje mbi tema me interes të përbashkët, duke përfshirë zhvillimet aktuale në Kosovë dhe situatën e politikave të sigurisë në Ballkanin Perëndimor.

Ky takim u zhvillua pas vizitës së Këshilltarit Federal Pfister të hënën tek personeli zviceran i shërbimit të stacionuar si pjesë e SWISSCOY në Mitrovicë dhe Novo Sellë.

“Sot kisha kënaqësinë të pres në takim Kancelarin Federal, Ministrin e Mbrojtjes, Mbrojtjes Civile dhe Sportit të Zvicrës, Martin Pfister. Ekzistojnë lidhje të natyrshme mes Kosovës dhe Zvicrës falë diasporës sonë, e cila ka një ndikim të rëndësishëm në forcimin e marrëdhënieve tona dhe në zhvillimin e vendit, ndaj bashkëpunimi bilateral ndërmjet shteteve tona është i pashmangshëm.

Me ministrin Pfister diskutuam për bashkëpunimin në fushën e trajnimeve dhe edukimit të ushtarakëve, një hap shumë i rëndësishëm për forcimin e kapaciteteve tona të mbrojtjes. E njoftova gjithashtu mbi zhvillimet e rëndësishme që Forca e Sigurisë së Kosovës (FSK) ka arritur gjatë viteve. Theksova edhe domosdoshmërinë e anëtarësimit të Kosovës në BE dhe NATO, për të garantuar stabilitetin e vendit tonë dhe të gjithë Ballkanit Perëndimor. Të dy u dakorduam që të thellojmë bashkëpunimin në fushat me interes të përbashkët. Faleminderit Zvicrës për mbështetje dhe besim. Së bashku po ecim drejt një të ardhme më të sigurt”, është shprehur ministri Maqedonci.