Policia e Zveçanit ka njoftuar se kanë hasur në një rimorkio ku pas kontrollit kanë hasur në dy thasë me uniforma, antiplumbë, 5 karikatorë të AK-47 me municion dhe pajisje të  tjera ushtarake.

Sipas policisë, dyshohet se këto armë i përkasin një personi të dyshimtë i cili tashmë është në kërkim për rastin “Banjska”.

Tutje Policia ka bërë të ditur se mjetet e  dyshimta të cilat janë konfiskuar janë si në vijim: 1 Uniformë ushtarake kamufluese, 5 karikator me 132 fishek të armës AK-47, 5 fatrolla për mbajtje te karikatorëve në gjoks, 4 palë pantallona ushtrak, 4 jakne ushtarake, 3 fotrolla të radiolidhjeve, 1 antiplumb, 2 rripa brezi ushtarak 1 jelek taktik, 1 çantë taktike 1 helmetë e gjelbër, 1 kapelë, dhe 1 dritë rrotative.

Të gjitha veprimet e ndërmarra i janë paraqitur Prokurorit të Shtetit i cili ka urdhëruar inicimin e rastit ‘’Mbajtja në pronësi, kontroll ose posedim i pa autorizuar të armëve”, nuk ka persona të arrestuar”, tha Policia.

Paul Williams, dëshmitari i dytë i mbrojtjes së ish-presidentit Hashim Thaçi, të enjten ka përfunduar dëshminë në Gjykatën Speciale, përcjell albinfo.ch.

Williams, i cili ishte këshilltar i delegacionit të Kosovës në Konferencën e Rambujesë, ka thënë të mos e ketë parë Hashim Thaçin si udhëheqës në këto bisedime.

Para tij, ka dëshmuar ish-këshilltari i lartë në Departamentin amerikan të Shtetit, James Rubin, i cili e përmbylli të mërkurën dëshminë e tij në rastin më të madh të Speciales. Ai theksoi se sa ka qëndruar në Kosovë, gjatë luftës, nuk ka parë asnjëherë ndonjë shtab, batalion apo njësi të UÇK-së.

Shqyrtimi gjyqësor pritet të vazhdojë të hënën me dëshmitarin e radhës të propozuar nga mbrojtja.

Dëshmitari Paul Williams tha në Hagë se kryeministri i atëhershëm i Qeverisë në ekzil, Bujar Bukoshi përpiqej të krijonte Forcat e Armatosura të Republikës së Kosovës (FARK).

Këtë deklarim, dëshmitari e bëri duke u përgjigjur në pyetjet shtesë të mbrojtjes së Hashim Thaçit, avokatit Luka Mishetiq, raporton “Betimi për Drejtësi“.

“Unë e dija se kryeministri Bukoshi përpiqej të krijone FARK-un bazuar fillimisht në Shqipëri që përbëhej nga oficerë shqiptarë ose oficerë që kishin shërbyer në Forcat Ushtarake të Jugosllavisë”, tha ai.

Dëshmitari tha se Bukoshi s’i ka kërkuar kurrë këshillë lidhur me FARK-un që ishte një iniciativë e LDK-së për të krijuar një krah lufte.

“Bujar Bukoshi nuk më ka kërkuar kurrë konkretisht këshillë lidhur me FARK-un, por në bisedat tona me Bukoshin dhe ato me diasporën shqiptaro-amerikane ishte pjesë e bisedave që ekzistonte. Ishte pjesë e tensionit të thellë. Ishte ndërmarrje e re e LDK-së për të krijuar një krah të armatosur.

Policia e Kosovës ka arrestuar sot në aeroportin e Prishtinës një 26-vjeçar të shpallur më herët në kërkim, i dyshuar për veprën penale Shkaktim i rrezikut të përgjithshëm, përcjell albinfo.ch.

I dyshuari, me inicialet Ç. B., shtetas i Kosovës, ishte identifikuar nga hetuesit e Sektorit Rajonal të Hetimeve. Ai dyshohet se më 18 gusht 2025 hodhi një shishe me lëndë ndezëse në një market në rrugën “Mbretëresha Teutë” në Mitrovicën e Jugut.

Pas arrestimit dhe intervistimit, prokurori caktoi masën e ndalimit policor ndaj tij.

Dëshmitari i dytë i mbrojtjes së ish-presidentit Hashim Thaçi, Paul Williams, do të vazhdojë sot dëshminë e tij para Dhomave të Specializuara, përcjell albinfo.ch.

Williams, këshilltar i delegacionit të Kosovës në Konferencën e Rambujesë (1999) dhe i angazhuar më vonë në negociatat e Vjenës (2006-2007), ka deklaruar se gjatë bisedimeve nuk e ka parë Thaçin si udhëheqës të plotë të negociatave. Ai tha se Thaçi duket se ishte i ndikuar nga interesa të jashtme, të cilat përcaktonin sjelljen dhe vendimet e tij gjatë procesit negociator.

“Krijohej përshtypja që dikush kishte kontroll mbi negociatat ose ndikim të pjesëm dhe se ai i përfaqësonte interesat e jashtme”, deklaroi Williams, duke vënë në dukje se e kishte bazuar këtë përshtypje nga mënyra si Thaçi përgjigjej në telefonata dhe gjestet e tij.

Para tij, dëshminë e kishte dhënë James Rubin, ish-këshilltar i lartë në Departamentin amerikan të Shtetit, i cili gjatë qëndrimit të tij në Kosovë gjatë luftës nuk kishte parë asnjë shtab, batalion apo njësi të UÇK-së.

Thaçi, së bashku me Kadri Veselin, Jakup Krasniqin dhe Rexhep Selimin, akuzohen për ndërmarrje të përbashkët kriminale që lidhen me krime lufte dhe krime kundër njerëzimit gjatë periudhës së luftës.

Kryeministri Albin Kurti, së bashku me Ministren e Industrisë, Ndërmarrësisë dhe Tregtisë, Rozeta Hajdari, Ministren Artane Rizvanolli dhe Shefin e Misionit të Dukatës së Madhe të Luksemburgut, Eric Dietz, prezantuan skemën e granteve për energji të pastër, me vlerë prej 1 milion euro, transmeton albinfo.ch.

Ky fond është i dedikuar për ndërmarrjet mikro, të vogla dhe të mesme (NMVM) me veprimtari primare dhe sekondare në prodhim, dhe zbatohet nga Agjencia për Investime dhe Përkrahje të Ndërmarrjeve (KIESA) në kuadër të Ministrisë së Industrisë.

Skema realizohet me kontribut financiar nga Luksemburgu dhe synon të mbështesë NMVM-të dhe startup-et vendore, duke promovuar inovacionin, energjinë e pastër dhe zhvillimin e qëndrueshëm ekonomik. Ministrja Hajdari theksoi rëndësinë e bashkëpunimit ndërkombëtar dhe transparencës në menaxhimin e fondeve, si dhe përfitimet që këto skema sjellin për konkurrencën e ndershme dhe rritjen e besimit të biznesit vendor.

Kjo iniciativë vjen pas disa skemave të tjera të suksesshme të lansuara nga MINT/KIESA, përfshirë grante për inovacion (1,9 milion euro) dhe për industrinë kreative (1,45 milion euro), gjithashtu me mbështetje nga LuxDev. Në ditët në vijim pritet nënshkrimi i marrëveshjes për grante për mësimin dual, në vlerë prej 1 milion euro, që do të mbështesë trajnimet për të rinjtë në sektorët prioritarë industrialë.

Ministrja Hajdari nënvizoi se bashkëpunimi me shtetin mik Luksemburg synon të forcojë ekosistemet e inovacionit, të rrisë konkurrueshmërinë e ndërmarrjeve dhe eksportet, si dhe të krijojë mundësi për zhvillim ekonomik të qëndrueshëm në Kosovë.