Autoriteti i Konkurrencës ka njoftuar se ka filluar monitorimin e tregut për shitjen e karburanteve, përcjell albinfo.ch.

Sipas tyre, kjo po bëhet me qëllim që të parandalohen abuzimi me çmimet, duke marrë parasysh rritjen e menjëhershme pas konflikteve në Lindjen e Mesme.

“Çdo marrëveshje, bashkërendim ose veprim i njëanshëm ndërmjet bizneseve, që ka për qëllim ose efekt rritjen artificiale të çmimeve, ndarjen e tregut ose kufizimin e konkurrencës, përbën shkelje të rëndë të ligjit dhe është subjekt i sanksioneve ligjore”, thuhet në njoftim.

Autoriteti i Konkurrencës u bën thirrje bizneseve të veprojnë në përputhje me parimet e konkurrencës së lirë dhe të ndershme, të shmangin çdo formë të bashkërendimit të çmimeve me operatorë të tjerë, të tregojnë përgjegjësi sociale ndaj qytetarëve dhe konsumatorëve, veçanërisht në këtë periudhë të zhvillimeve ekonomike dhe gjeopolitike.

Nga ana tjetër edhe ministrja e Tregtisë në Kosovë, Mimoza Kusari-Lila ka nënshkruar vendimin për caktimin e çmimeve të produkteve të naftës, pas rritjes së menjëhershme të çmimeve të derivateve si rrjedhojë e ngjarjeve në Lindjen e Mesme.

Sipas ministres, ky vendim ishte i domosdoshëm për mbrojtjen e konsumatorëve dhe garantimin e konkurrencës së drejtë e të ndershme në tregun vendor.

Vendimi vjen pas mbikëqyrjes së vazhdueshme të tregut të naftës, analizimit të evidencave ditore nga Dogana e Kosovës dhe raporteve të Inspektoratit Qendror të Mbikëqyrjes së Tregut, ku është konstatuar se rritjet e çmimeve nga importi janë reflektuar menjëherë në çmimet e shitjes.

Referuar vendimit, marzhi tregtar maksimal i lejuar për shitjen me shumicë do të jetë deri në 2 centë për litër, ndërsa për shitjen me pakicë deri në 12 centë për litër.

Ministrja e Tregtisë thekson se inspektorët do të jenë në terren për të mbikëqyrur zbatimin e këtij vendimi. Ndërsa, çdo shkelje apo moszbatim i këtij vendimi do të trajtohet sipas legjislacionit në fuqi.

Presidentja e Republikës së Kosovës, Vjosa Osmani, ka parakaluar para ushtarëve të Forca e Sigurisë së Kosovës gjatë një ceremonie të mbajtur në kazermën Kazermën “Adem Jashari”, përcjell albinfo.ch.

Pas parakalimit të presidentes, pritet të zhvillohet edhe rreshtimi i kuadrateve të FSK-së në këtë kazermë.

Në këtë ceremoni po marrin pjesë edhe kryetarë komunash, përfaqësues diplomatikë, ministra dhe deputetë të institucioneve të vendit.

Pjesë e aktivitetit janë gjithashtu edhe familjet e dëshmorëve, përfshirë familjen e komandantit legjendar Adem Jashari.

Më 5 mars 2026, kuadratet e Forcës së Sigurisë së Kosovë u rreshtuan në nder të Epopesë së Ushtrisë Çlirimtare të Kosovës në kazermën “Adem Jashari”.

Me rastin e shënimit të Epopesë së UÇK-së, Forca e Sigurisë së Kosovës ka rreshtuar kuadratet e saj, në ceremoninë zyrtare që po mbahet në Kazermën “Adem Jashari” në Prishtinë.

Epopeja e UÇK-së shënohet me 5,6 dhe 7 Mars në nderim të luftës së familjes Jashari.

Fotoreporteri i Telegrafit, Ridvan Slivova ju sjell fotografi nga rreshtimi i kuadrateve të FSK-së.

Kryeministri i Kosovës, Albin Kurti ka thënë se sot pasdite do t’i vazhdojnë përpjekjet për të zgjedhur presidentin, përcjell albinfo.ch.

Ai duke hyrë në ndërtesën e Kuvendit pas mbledhjes solemne të Qeverisë për nder të Epopesë së UÇK-së ka thënë se urojnë e shpresojnë që të ketë edhe një kandidatë të dytë në garën për president.

“Pasdite do t’i vazhdojmë përpjekjet për ta zgjedhur presidentin. Urojmë e besojmë e shpresojmë edhe për një kandidaturë të dytë në mënyrë që ta përmbushim kërkesën kushtetuese për garë”, ka thënë ai.

Sot është dita e fundit për mbajtjen e seancës për zgjedhjen e presidentit të ri të Kosovës. 

Të mërkurën u raportua për mbajtjen e një seance, por që ajo nuk u thirr në mungesë të plotësimit të kushtit që të jenë dy kandidatë në garë për kryetar të shtetit. 

Kryetarja e Kuvendit të Kosovës, Albulena Haxhiu, në një paraqitje publike mbrëmjen e së mërkurës ka thënë se zv.kryeministri dhe ministri i Punëve të Jashtme, Glauk Konjufca është i vetmi kandidat i propozuar me nënshkrimet e 30 deputetëve të Lëvizjes Vetëvendosje (LVV) dhe të grupit multietnik.

Por që sipas saj seanca nuk mund të mbahet me vetëm një kandidat. 

Biblioteka Kombëtare e Kosovës “Pjetër Bogdani” me rastin e përvjetorit të 28-të të Epopesë së UÇK-së, sot me fillim nga ora 11:00, në dy atriumet e veta, do të hapë dy ekspozita në shenjë nderimi dhe kujtimi për luftën e lavdishme të Ushtrisë Çlirimtare të Kosovës.

Ekspozita Epopeja e UÇK-së në shtypin e Kosovës (2000-2020) paraqet mënyrën sesi Epopeja e UÇK-së është organizuar, kujtuar, festuar dhe interpretuar në shtypin e Kosovës përgjatë dy dekadave pas luftës.

Ekspozita trajton narrativën e përvjetorëve të epopesë më 5, 6, 7 mars, gjuhën e përdorur në titujt e gazetave për këtë epope, ndryshimin e diskursit medial ndër vite për këtë epope dhe, po ashtu, heroizimin dhe institucionalizimin e kujtesës kombëtare.

Mesazhi i kësaj ekspozite është: epopeja e UÇK-së nuk është vetëm ngjarje historike, por edhe proces i vazhdueshëm i ndërtimit të kujtesës përmes fjalës së shkruar.

Ekspozita tjetër, e cila, po ashtu, do të hapet nesër në atriumin e BKK-së, me titull “Ditënetët e zjarreve në Prekaz”, është vizuale dhe emocionale. Ajo përqendrohet në vendin fizik ku ka ndodhur sakrifica e familjes Jashari, në Kompleksin Memorial “Adem Jashari” në Prekaz. Kjo ekspozitë përbëhet nga 36 fotografi të fotografit nga Skenderaj, Sefer Aliqkaj, i cili i ka realizuar kryesisht në Prekaz.

Titulli i kësaj ekspozite, “Ditënetët e zjarreve në Prekaz”, simbolizon: zjarrin e luftës, zjarrin e sakrificës, zjarrin e kujtesës dhe mbijetesën. Fotografitë e realizuara në vendlindjen e familjes së Adem dhe Hamëz Jasharit nuk janë vetëm dokumentim, por dëshmi e një hapësire të shndërruar në simbol kombëtar.

Përmbajtja e kësaj ekspozite është me fotografi panoramike nga Kompleksi Memorial “Adem Jashari” në Prekaz, nga shtëpitë e familjes Jashari, nga peizazhi i lagjes Jashari, nga shenjat e sakrificës, nga gjurmë të plumbave nëpër shtëpitë e tyre dhe gjësendet përbri shtëpive të tyre, nga muret e djegura dhe të shkatërruara, nga objektet e ruajtura nga institucionet e Kosovës, nga festimet e përvjetorëve të Epopesë në disa edicione, nga ceremonitë festive, nga flakadanët, nga qytetarët që vizitojnë kompleksin dhe nderojnë të rënët, nga Jasharët e brezit të vjetër dhe të rinj etj.

Mesazhi i përbashkët i këtyre dy ekspozitave është se Prekazi nuk është vetëm vend historik, por altar i kujtesës kombëtare.

Kryetarja e Kuvendit të Kosovës, Albulena Haxhiu në seancën solemne për shënimin e 28-vjetorit të Epopesë së UÇK-së foli për historinë e 5,6 dhe 7 marsit të vitit 1998, e ku tha se shtëpia e zakonshme e familjes Jashari u kthye në qendrën e një përballje që ndryshoi historinë, përcjell albinfo.ch.

“Në marsin e 1998 shtëpia e Jasharëve ishte si shtëpitë e tjera në Kosovë. Një oborr i zakonshëm, mure të ngritura me shumë mund. Një prag që hapej e mbyllej çdo ditë për fëmijë që hynin e dilnin, gra e burra që mbanin familjen dhe shtëpinë. Në agimin e 5 marsit, forca të shumta policore dhe ushtarake serbe izoluan fshatin. Zunë pozicione me mjete të blinduara dhe artileri të rëndë. Një aparat i tërë shtetëror dhune u përqendrua para familjes Jashari. Shtëpia u rrethua, rrugët u bllokuan, lëvizja u ndërpre. Komandanti Adem Jashari dhe gjithë Jasharët atë ditë e dinin se çfarë dite kishte ardhur. Shtëpia që deri dje ishte e zakonshme u kthye në qendër të një përballjeje që ndryshoi historinë”, tha Haxhiu.

Ajo tha se lufta e Jasharëve ishte për një popull që kërkonte të mosdorëzohej.

“Në tri ditë luftime, e gjithë historia e Kosovës kaloi përmes Jasharëve dhe qëndresës së tyre, përmes vendosmërisë për të mos u larguar nga toka e tyre. Ata morën mbi vete barrën më të rëndë të kohës, një detyrë të vështirë, por shumë të rëndë. Në atë shtëpi ishin Adem Jashari dhe Hamëz Jashari, prindërit Shaban e Zahide, gratë dhe fëmijët, të gjithë bashkë, krah për krah, të vetëdijshëm për atë që po vinte. Askush nuk u largua. Gra dhe burra luftuan e qëndruan. Çdo dhomë, çdo oborr u kthye në vijë mbrojtjeje. Çdo shpërthim dhe çdo krisme u bë betejë për liri. Lufta e atyre tri ditëve nuk ishte vetëm për një familje, ishte për një popull që kërkonte të mos dorëzohej, të mos nënshtrohej. Në fund të atyre tri ditëve u vranë të moshuar që kishin parë shumë, burra e gra në moshën e forcës, por edhe fëmijë që sapo kishin nisur jetën. Sakrifica e tyre mbeti jo vetëm dhimbje, por themeli i kujtesës dhe i qëndresës së kombit tonë”, tha ajo.

Kryeministri i Kosovës,  Albin Kurti, ka folur në seancën solemne që po mbahet në Kuvend me rastin e 28-vjetorit të Epopesë së UÇK-së, duke kujtuar sakrificën e familjes së Adem Jasharit dhe luftën për liri, përcjell albinfo.ch. 

Kurti para deputetëve të Kuvendit dhe të pranishmeve tjerë tha se Epopeja e UÇK-së u bë thirrje për mobilizim, bashkim dhe artikulim të qartë të synimit për liri e mëvetësi.

“Në ato ditë të përbllajes së vullnetit për liri me aparatin e shtypjes në Prekaz historia u shkrua me zjarr e gjak. Toka u bë altar i lirisë e një familje u bë simbol kombëtar. Figura e kryekomandantit Adem Jashari e lidhur pazgjidhshmërisht me fatin e familjes dhe bashkëluftëtarëve të tij u bë personifikim i vendosmërisë për të mos e pranuar nënshtrimin”, tha ai

Kurti tutje theksoi se kjo sakrificë u përjetësua në vetëdijen e kujtesën tonë kolektive, se liria paguhet shtrenjtë dhe se është vlerë e panegociueshme dhe e drejtë e patjetërsueshme.

“Epopeja e UÇK-së u bë thirrje për mobilizim, bashkim dhe artikulim të qartë të synimit tonë për liri dhe mëvetësi”, tha ai.

Kryeministri Kurti tha se qëndresa e familjes Jashari dhe të gjithë atyre që u rreshtuan krah tyre e pas tyre në udhën e çlirimit përbëjnë një trashëgimi të thellë politike, kulturore e kombëtare prej së cilës buron liria e Kosovës.

“Krismat e pushkës në Prekaz u përhapën larg deri te ndërgjegja e diplomacisë ndërkombëtare. Ato krisma zgjuan mbarë kombin dhe shumëfishuan radhët e UÇK-së, duke shndërruar rezistencën në lëvizje të pandalshme për liri”, tha Kurti.

Deputetët e Kuvendit të Kosovës, bashkë me mysafirë të shumtë, janë mbledhur në sallë për seancën solemne për Epopenë e UÇK-së.

Në sallë prezente është edhe Presidentja Vjosa Osmani.

Pas saj hyri edhe kryeministri Albin Kurti, por ky i fundit nuk e përshëndeti të paren e shtetit.

Për dallim nga ai, kryetarja e Kuvendit, Albulena Haxhiu dhe ministri i Jashtëm, njëherësh kandidat për president nga LVV-ja, Glauk Konjufca, ia shtrënguan dorën asaj.

Gjatë fjalimit, ajo tha se tri ditët e Epopesë janë histori, 53 shpirtra u bënë dritë për popullin.

Presidentja foli për rëndësinë historike të muajit mars 1998 dhe sakrificën e familjes Jashari në Prekaz, përcjell albinfo.ch.

“Muaji mars ishte muaji i përballjeve që vendosën drejtimin e historisë tonë. Pikërisht më 5, 6 dhe 7 mars 1998, në zemër të Prekazit, historia jonë mori drejtim të ri. Këtu qëndresa, sakrifica, heroizmi dhe e ardhmja jonë u vunë në një vend.

Në bedena të kullave të Prekazit qëndroi komandanti legjendar Adem Jashari bashkë me familjen e tij, duke zgjedhur sakrificën përpara përkuljes, lirinë para frikës dhe mbi të gjitha nderin para jetës,” tha Osmani.

Presidentja theksoi se ato tri ditë marsi u bënë muaji i epopesë dhe i sakrificës që ringjalli një komb të tërë.

“Në ato tri ditë, 58 shpirtëra u bënë dritë për një popull. Këtu, krisma e armëve nuk ishte vetëm zhurmë baruti, por thirrje për liri. Ky ishte kushtrimi që zgjoi Drencin, Kosovën dhe gjithë kombin, dhe ndërgjegjen e gjithë botës,” shtoi ajo.

Osmani vuri në dukje se prej Prekazit nisi orteku i lirisë që nuk u ndal më.

“Epopeja është epike sepse buroi nga populli. Praku i kullave në Prekaz ishte baza e Ushtrisë Çlirimtare të Kosovës, sepse gjithçka buroi nga populli. Lufta që e bëri UÇK-ja ishte jo vetëm e drejtë, por edhe e domosdoshme, dhe do ta mbrojmë sa të jetoj jeta,” tha Osmani.

Presidentja nënvizoi rolin dhe vendosmërinë e familjes Jashari.

“Familja Jashari vazhdon të jetojë aty ku e vendosi historia, në piedestalin më të lartë të sakrificës për atdheun. Lufta e Jasharajve nuk ishte betejë e vetëm një populli, ajo u pasqyra dhe u mbështet edhe nga miqtë tanë nga SHBA-të, aleatët tanë evropianë dhe shumë shtete tjera demokratike. Sa herë që dikush dyshon në forcën e këtij populli, mjafton të përmend një emër: Adem Jashari dhe familja Jashari,” përfundoi Osmani.

Afati kushtetues për zgjedhjen e presidentit ose presidentes së Kosovës po hyn në fazën vendimtare. Sot, 5 mars 2026, është dita e fundit për përfundimin e procesit brenda afatit 30-ditor para skadimit të mandatit aktual, raporton albinfo.ch.

Lëvizja Vetëvendosje (LVV) ka zyrtarizuar kandidaturën e saj, duke propozuar Glauk Konjufcën për këtë post.

Dje, kryeministri dhe lideri i LVV-së, Albin Kurti, zhvilloi takime me kryetarët e Partisë Demokratike të Kosovës (PDK), Bedri Hamza, dhe Lidhjes Demokratike të Kosovës (LDK), Lumir Abdixhiku, por pa arritur një marrëveshje konkrete.

Gjatë bisedimeve është diskutuar edhe mundësia e një kandidature nga familja e komandantit legjendar Adem Jashari, por Murat Jashari ka bërë të ditur se familja nuk ka ambicie për këtë post.

Presidentja aktuale, Vjosa Osmani, ka shprehur dëshirën për një mandat të dytë, ndërkohë që LVV vazhdon të mbështesë kandidaturën e Glauk Konjufcës. Po ashtu, akademiku Arsim Bajrami ka shprehur gatishmëri për të kandiduar.

Sipas Kushtetutës së Kosovës, për nominim nevojiten të paktën 30 nënshkrime deputetësh, ndërsa për zgjedhje kërkohen 80 vota. Me 57 deputetë, LVV duhet të bashkëpunojë me partitë e tjera për të siguruar shumicën e nevojshme.

Njohësi i çështjeve juridike nga Instituti i Kosovës për Drejtësi, Naim Jakaj, sqaron se moszgjedhja e presidentit brenda afatit nuk çon automatikisht në zgjedhje. Sipas tij, nëse brenda 60 ditëve nga nisja e procedurës nuk zgjidhet presidenti, Kuvendi shpërndahet dhe vetëm atëherë organizohen zgjedhje të reja, të cilat duhet të mbahen brenda 45 ditëve nga shpallja e tyre.

Kosova gjendet kështu në një moment kritik politik, ku dialogu ndërpartiak është vendimtar për stabilitetin institucional dhe të ardhmen e presidencës./Albinfo.ch