Dy qytete zvicerane i bashkohen listës “kreative” të UNESCO-s

Kjo është hera e parë që qytetet zvicerane i janë bashkuar kësaj liste dhe vetëm dy qytete për çdo vend mund t'i bashkohen rrjetit, çdo dy vjet.

Friburgu dhe Montreux i janë bashkuar Rrjetit të Qyteteve Kreative të UNESCO-s (CCN).

Friburgu u pranua në kategorinë “Gastronomi” dhe Montreux në kategorinë “Muzikë”, njoftuan të enjten administratat e tyre përkatëse, përcjell albinfo.ch.

Të dy qytetet duhej të paraqisnin një plan veprimi katërvjeçar për t’u pranuar në rrjet. Plani i veprimit për Friburgun, i cili është i famshëm për traditën e tij të festës së benichon, “përqendrohet në inovacionin në gastronomi”, shpjegoi administrata e qytetit në një deklaratë për shtyp.

Objektivat kryesore të planit janë forcimi i Friburgut si një vend inovacioni dhe kërkimi në sektorin agro-ushqimor; të promovojë arsimin dhe integrimin profesional, riintegrimin përmes gastronomisë; dhe të sigurojë që gastronomia të vazhdojë të jetë një mjet kryesor marketingu për qytetin, thuhej në dokument, shkruan swissinfo.

“Përvoja muzikore për të gjithë”

Nga ana e tij, Montreux ka në plan të “bëjë krijimtarinë muzikore një vektor për zhvillimin dhe integrimin urban”, tha komuna në një deklaratë për shtyp.

Një nga qëllimet e planit të tij katërvjeçar është “promovimi i përvojave të lira dhe gjithëpërfshirëse rreth muzikës”, me, për shembull, një rrugë përmes qendrës së qytetit që ofron “afreske artistike dhe përvoja muzikore” për të gjithë.

Montreux, synon gjithashtu të inkurajojë shfaqjen e talenteve të rinj me një program special të quajtur “Les Emergences musicales”. Këto, së bashku me “Montreux Jazz Festival Residency”, e pozicionojnë qytetin “si një Mekë për krijimin dhe edukimin muzikor”, sipas bashkisë.

Ndryshe, “Rrjeti i Qyteteve Kreative” u krijua në vitin 2004 për të promovuar bashkëpunimin ndërkombëtar midis qyteteve që kanë identifikuar kreativitetin si një faktor strategjik në zhvillimin e qëndrueshëm urban. Deri më sot, 350 qytete janë anëtare.

Rrjeti ka shtatë fusha të dallueshme krijuese: artizanat dhe artet popullore, artet dixhitale, kinemaja, dizajni, gastronomia, letërsia dhe muzika.

---