Edon Zhegrova shënon gol për Baselin

Pas tetë javëve të para, Baseli është lider i Superligës me 19 pikë

Edon Zhegrova ka realizuar një gol të mrekullueshëm për Baselin në kuadër të Superligës së Zvicrës, në ndeshjen me Zurichun.

Zhegrovës, i cili u inkuadrua në minutën e 73-të, iu deshën vetëm shtatë minuta për të arritur golin.

Ai realizoi një supergol duke dribluar shumë kundërshtarë. Zhegrova shënoi golin e tretë, në fitoren 4 me 0.

Anësori kosovar ka pasur shumë pak hapësirë për Baselin, klubin në të cilin është i huazuar deri në verën e 2020-es, duke i bërë vetëm katër paraqitje si titullar dhe shtatë si zëvendësues. Në takimin e sotëm, mesfushori i Shqipërisë, Taulant Xhaka asistoi dy herë, duke bërë një paraqitje të mirë.

Pas tetë javëve të para, Baseli është lider i Superligës me 19 pikë, tri më shumë se kampioni në fuqi, Young Boys.

---