Franca duhet të bëjë më shumë për të pastrehët

Ligjet që synonin të mbronin njerëzit në Francë kanë dështuar, thotë raportuesja speciale e OKB-së për strehimin, përcjell albinfo.ch.

“Dëbimet që po ndodhin në gjithë vendin, në një kontekst të ndryshëm, nuk po ndodhin në përputhje me ligjin ndërkombëtar për të drejtat e njeriut”, tha Leilani Farha për Reuters.

Raporti i Farhas vjen pas udhëtimeve të saj në kampet e improvizuara të emigrantëve në Paris dhe në qytetin port të Calais. Ajo gjithashtu vizitoi vendbanime rome në periferi të qytetit, përcjelli albinfo.ch.

“Në Calais, takova një popullsi migrantësh që janë sigurisht në një lloj traume”, shtoi avokatja kanadeze, duke kritikuar trajtimin policor të migrantëve, duke fjetur në pyje dhe në rrugë.

Franca, si shumica e vendeve evropiane, ka parë një rritje të të pastrehëve në dekadën e fundit, të nxitur nga pasojat e krizës financiare globale.

Sipas Institutit Kombëtar të Statistikave dhe Studimeve Ekonomike të Francës (INSEE), më shumë se 12,000 njerëz flenë në rrugët e Francës. Sipas të njëjtit institut, në Paris rreth 463,000 njerëz jetojnë nën vijën e varfërisë. Ata kanë të ardhura mesatare mujore prej € 747, që është € 261 nën pragun e varfërisë, përcjell albinfo.ch.

Në 2018-ën, 566 njerëz të pastrehë vdiqën në mbarë vendin, sipas  Les Morts de la Rue. Më shumë se 100 prej tyre ishin vetëm në Paris.

Sipas ligjit francez, banorëve që kanë të drejtë për strehim social duhet t’u sigurohen ndihmë brenda gjashtë muajve, në mungesë të të cilave banorët mund të ankohen në gjykatë.