Freedom House: Kosova, pjesërisht e lirë

Kosova vazhdon ta ketë statusin “pjesërisht e lirë”, njësoj sikurse edhe Shqipëria, Maqedonia dhe Bosnja e Hercegovina. Serbia dhe Mali i Zi kanë statusin e vendeve “të lira”.

Rajoni i vetëm në botë ku gjendja e lirive dhe të drejtave të njeriut vazhdon të përkeqësohet për çdo vit që nga 2001, është hapësira e vendeve të dala nga ish-Bashkimi Sovjetik, me përjashtim të vendeve Baltike.

Ky është një nga vlerësimet e raportit të fundit të organizatës Freedom House, lidhur me gjendjen e lirive politike dhe të drejtave të njeriut në botë. Kjo rënie në vazhdimësi përfaqëson periudhën më të gjatë të përkeqësimit të situatës pandërprerë në 39 vitet, që kur publikohet ky raport.

Në total, sipas raportit të Freedom House, numri i vendeve të lira në vitin 2010 ra në 87 nga 89 që ishte një vit më parë. Numri i vendeve që janë demokraci zgjedhore ka rënë në 115, krahasuar me 123 që ishte në 2005.