Ganimet Shala, e vetmja shqiptare që kandidon për deputete në Slloveni

Shqiptarja nga Lubjana synon një vend në Parlamentin e Sllovenisë, duke premtuar ndershmëri, guxim dhe angazhim për qytetarët

Ganimet Shala, shqiptarja e vetme kandidate në zgjedhjet që do të mbahen më 22 mars 2026, ka shpallur kandidaturën e saj për deputete në National Assembly of Slovenia, shkruan albinfo.ch.

“Jam e vetmja shqiptare kandidate në Slloveni dhe kandidoj në një nga zonat e Lubjanës,” ka thënë Ganimet Shala për platformën Albinfo.ch.

 

 

Në një mesazh drejtuar qytetarëve, ajo thekson se vendimi për t’u përfshirë në politikë vjen nga përvoja e jetës së përditshme dhe nga bisedat me njerëzit që përballen me sfida të ndryshme sociale dhe ekonomike.

 

 

“Nuk premtoj zgjidhje të lehta. Premtoj ndershmëri, guxim, punë dhe zë që do të flasë qartë, vendosmërisht dhe në favor të popullit në Parlament. Unë jam një prej jush. E njoh jetën jashtë qarqeve politike”, ka thënë ajo.

 

 

Shala thekson se kandidimi i saj nuk është motivuar nga politika si qëllim në vetvete, por nga dëshira për të përfaqësuar qytetarët dhe për të adresuar shqetësimet që lidhen me të ardhmen e të rinjve, sigurinë sociale dhe mirëqenien e familjeve.

“Nuk po hyj në politikë me fjalë të bukura, por me një angazhim të qartë: të punojmë, të këmbëngulim dhe të arrijmë rezultate konkrete”, thekson ajo, duke ftuar qytetarët që ta mbështesin në këtë rrugë politike.

Në mesazhin e saj publik, kandidatja nga Ljubljana apelon për më pak premtime dhe më shumë veprime konkrete, duke theksuar se ndryshimi mund të arrihet vetëm përmes bashkëpunimit dhe angazhimit të përbashkët të qytetarëve.

“Për njerëzit. Për të ardhmen. Për të gjithë ne!”, përfundon mesazhin e saj Ganimet Shala./Albinfo.ch.

Ganimet Shala, asambleistja e parë shqiptare në Parlamentin e Lubjanës

---