Nga 1 korriku në Kosovë funksionalizohet Kodi +383

Kodi telefonik i Kosovës +383 do të jetë funksional që nga 1 korriku, ndërsa brenda këtij viti do t’i shtohet Kosovës edhe një operator i tretë mobil

Kryetar i Bordit të Agjencisë për Komunikime Postare dhe Elektronike (ARKEP), Kreshnik Gashi, ka thënë se kodi telefonik i Kosovës +383 do të jetë funksional që nga 1 korriku, ndërsa brenda këtij viti do t’i shtohet Kosovës edhe një operator i tretë mobil, i cili sipas marrëveshjes së Brukselit, do të jetë për komunitetin serb.

Aktualisht në Kosovës funksionojnë dy operatorë mobil “Vala” dhe “IPKO” si dhe operatori virtual “Z Mobile”, por konkurrenca mund të rritet gjatë këtij viti.

Drejtuesi i AKREP-it, Kreshnik Gashi ka thënë se gjatë këtij viti do të përgatisin tenderin për operatorin e tretë mobilë në vend. Sipas Gashit, gjatë vitit të kaluar kanë punuar shumë për kodin telefonik +383 dhe janë duke bërë përgatitjen përfundimtare për implementimin e plotë të tij.

“Viti 2017 është viti ku është punuar në masë të madhe për kodin +383. Afati përfundimtar kur do të filloj implementimi i kodit të Kosovës +383 është 31 qershori i këtij viti. Pra qytetarët e Kosovës, do të kenë një kod unik, do të kenë identitetin e vet”, ka treguar ai për telegrafin.

Gashi ka thënë se në marrëveshje me ITU-në për kodin telefonik është saktësuar edhe funksionimi i roamingut, duke përfshirë është shtetin e Serbisë.

“Shfrytëzimi i +383 është i lidhur edhe me funksionimin e roamingut dhe nuk do të kemi problem për të komunikuar me gjithë botën. Në Serbi funksionimin e operatorëve të Kosovës deri më tani, e kanë ndaluar në mënyrë politike. Pjesë e marrëveshjes ka qenë edhe funksionimi i roamingut edhe në Serbi”, theksoi ai.