“Gjermania mbështet Kosovën për viza”

Në këtë takim Pacolli dhe Mass diskutuan edhe për dialogun Kosovë-Serbi

Ministri i Punëve të Jashtme të Kosovës, Behgjet Pacolli, deklaroi se ka marrë një lajm të mirë nga ministri i Jashtëm gjerman, Heiko Mass.

Pacolli nga Varshava tha se homologu i tij gjerman e konfirmoi se Gjermania me të gjithë mekanizmat e saj mbështet plotësisht liberalizimin e vizave për Kosovën, përcjell albinfo.ch.

“Lajm fantastik nga ministri i jashtëm gjerman, Mass. Në Varshavë, zhvillova një takim bilateral me ministrin e jashtëm gjerman Heiko Mass, i cili tashmë konfirmoi se Gjermania me të gjithë mekanizmat e saj mbështet plotësisht liberalizimin e vizave për Kosovën. Partnerë si Gjermania, kanë ndihmuar çlirimin, pavarësimin dhe shtetndërtimin e Kosovës, ndërsa sot na mbështesin në zhvillimin e vendit tonë”, ka shkruar Pacolli në llogarinë e tij “Facebook”.

Ministri i MPJ, tha se me homologun e tij Mass biseduan edhe për raportet që duhet t’i intensifikojnë Kosova dhe Gjermania. Në këtë takim Pacolli dhe Mass diskutuan edhe për dialogun Kosovë-Serbi.

“Gjermania si njëri ndër përkrahësit më të fuqishëm të Kosovës vazhdon mbështetjen e madhe për Kosovën. I inkurajuar jashtëzakonisht shumë me mbështetjen e madhe gjermane për, vazhdimin e dialogut me Serbinë, rëndësinë e këtyre bisedimeve dhe arritja e një marrëveshje në mes dy shteteve në afat sa më të shkurtër. Njoftova ministrin Mass për platformën e dialogut e cila ditë më parë u miratua në Kuvendin e Kosovës, dhe për gatishmërinë e palës kosovare për rifillim të dialogut. I shpreha edhe shqetësimet për kampanjën agresive dhe shpifëse të Serbisë rreth njohjeve të shtetit të Kosovës. Mass theksoi rëndësinë e takimit të datës 29 prill ku janë të ftuar të gjithë liderët e Ballkanit Perëndimor me ftesë të Angela Merkel dhe presidentit francez, Macron”, ka përfunduar Pacolli.

---