Grupi i valleve “Tradita” sonte përfaqëson kulturën shqiptare në Stockholm

“Tradita” ngjitet në skenën e Stockholm-it me valle shqiptare

Sonte, më 9 maj 2026, në kuadër të festimeve të Dita e Europës, në Stockholm do të mbahet një program i veçantë kulturor në parkun Kungsträdgården, ku do të marrin pjesë grupe artistike nga vende të ndryshme të Evropës, transmeton albinfo.ch.

Në këtë ngjarje ndërkulturore, komuniteti shqiptar do të përfaqësohet nga grupi i valleve Albanian Folkgroup Tradita, i cili do të sjellë para publikut vallet tradicionale shqiptare, duke prezantuar pasurinë e folklorit dhe kostumeve kombëtare.

Grupi do të performojë në orën 17:20, nën udhëheqjen artistike të koreografit Euklid Cakrani, duke synuar të promovojë kulturën shqiptare në një nga eventet më të rëndësishme ndërkulturore në kryeqytetin suedez.

Pjesëmarrja e ansamblit shqiptar vlerësohet si një mundësi e rëndësishme për të prezantuar identitetin kulturor shqiptar në një skenë evropiane, në një ditë që feston unitetin dhe diversitetin e kontinentit./Albinfo.ch

---