Hadergjonaj: Miralemi i vetëdijshëm se çfarë e pret në Shqipëri

Futbollisti shqiptar i “Young Boys” të Zvicrës, Florent Hadergjonaj, ka pasur biseda të shpeshta me bashkëlojtarin e tij, Miralem Sulejmani, në prag të  ndeshjes Shqipëri – Serbi, e cila do të zhvillohet të enjten në mbrëmje. Talenti deçanas ia ka bërë me dije futbollistit me prejardhje nga Prizreni se ekipi i tij, Serbia, do ta ketë të vështirë të marrë pikë në “Elbasan Arena”.

“Kemi biseduar shpesh me Miralemin. Ai pret se ndeshja ka me qenë shumë e fortë, por thotë se le të fitojë ekipi që e meriton. Edhe Miralemi e di se do ta kenë shumë të vështirë të fitojnë në Shqipëri”, ka thënë Florenti për albinfo.ch.

Mbrojtësi Hadergjonaj nuk do të ketë mundësinë për ta përcjellë ndeshjen nga fillimi, sepse atë ditë do të luajë me U 21 të Zvicrës. Por, thotë se shanset e kombëtares shqiptare janë shumë të mira për kualifikim. “Do të mundohem ta përcjell ndeshjen, vetëm pjesën e dytë. Shqipëria është forcuar shumë kohët e fundit dhe ka treguar lojëra të shkëlqyera dhe unë besoj se do të kualifikohemi”, shprehet ai.

Me fjalën  “do të kualifikohemi” sikur na bëri me dije se edhe ai një ditë mund të vishet kuq e zi. “Kam pasur kontakte me kombëtaren shqiptare dhe atë të Zvicrës. Është ende herët për të folur se për cilën kombëtare do të luaj, por mundësia është e hapur”.

Tutje me Florentin biseduam edhe rreth derbit Bazel – Young Boys, ku gjatë fjalosjes së Taulant Xhakës më Renato Steffen, Florenti nga pamjet televizive shihet duke e shtyrë Xhakën për t’i dalë në mbrojtje lojtarit të ekipit të tij.

“Mendoj se është bërë një keqinformim nga mediat. Unë kam kontakte shumë të mira më Taulantin. Sa herë që luajmë kundër njëri – tjetrit, i ndërrojmë fanellat së bashku. Në atë moment unë e kam shtyrë pak Taulantin, sepse dëshiroja ta ruaja që të mos bëhet diçka më keq për të. I kam thënë të largohet që të mos e filmojnë kamerat. Kjo ka qenë e tëra dhe ne prapë mbetemi shokë”, sqaroi ai.

Në fund të bisedës Florentin e pyetëm se gjatë ndeshjes Shqipëri – Serbi më shumë dëshirë ka të shënojë Taulant Xhaka apo Miralem Sulejmani,ndërsa ai u përgjigj. “Nuk është e rëndësishme kush shënon, e rëndësishme është që në fund Shqipëria të fitojë”.